بیجنگ(مانیٹرنگ ڈیسک) پاکستان اورچین میں مثالی دوستی کے چرچے دنیابھرمیں ہیں لیکن ایک اوراہم انکشاف ہواہے کہ چین کے قصائی بھی پاکستانی قصائیوں کے نقش قدم پرچل پڑے ہیں ۔پاکستان میں توگدھے اورکتے کے گوشت کی خبریں میڈیاکی زینت بنتی رہی ہیں لیکن اب چین سے بھی ایسی ہی خبرآگئی ہے لیکن دوست ملک میں صورتحال تھوڑی سی مختلف ہے ۔
چین میں خرگوش کاگوشت مہنگاہے اورچینی عوام اس کوبڑے شوق سے کھاتے ہیں جس کودیکھتے ہوئے چینی قصائیوں نے خرگوش کے گوشت کی بڑھتی قیمتوں کودیکھ کرخرگوش کی جگہ بلیوں کاگوشت فروخت کرناشروع کردیاہے ۔چینی میڈیاکی رپورٹس کے مطابق چین کے مغربی علاقے میں قصائیوں نے خرگوش کے نام پرآوارہ بلیوں کاگوشت فروخت کرناشروع کردیاہے ۔
میڈیارپورٹس کے مطابق اس معاملے میں ایک گروہ سڑکوں اورگلیوں میں پھرنے والی بلیوں کوپکڑکرایک پنجرے میں بندکرتاہے اورجب ان بلیوں کوپکڑرہاہوتاہےتوشہریوں کوبتایاجاتاہے کہ ان کاتعلق جانوروں کے تحفظ کی ایک تنظیم سے ہے جوکہ بلیوں کی نسل کوبچانے کےلئے کام کررہی ہے ۔خرگوش کی جگہ بلیوں کے گوشت کی خبریں میڈیاپرآنے پرحکام نے کارروائی کرتے ہوئے کئی مذبحہ خانے بند کردیئے ہیں اوران آوارہ بلیوں کوپکڑکرگوشت کی شکل میں فروخت کرنے والے افراد کی تلاش شروع کردی ہے تاہم یہ ابھی تک واضح نہیں ہواہے کہ یہ ایک شخص کاکام ہے یاکوئی بڑاگروہ ملوث ہے ۔مقامی شہریوں نے بھی آوارہ بلیوں کوپکڑنے کی تصدیق کی ہے تاہم ان کاکہناتھاکہ ان کویہ معلوم نہیں کہ ان بلیوں کوکس مقصدکےلئے استعمال کیاجارہاہے ۔
