کراچی ( این این آئی ) متحدہ قومی موومنٹ( ایم کیو ایم ) کے رکن سندھ اسمبلی رؤف صدیقی نے کہا ہے کہ میں قید میں انکشافات پر مبنی کتاب لکھ رہا ہوں ۔ وہ بدھ کو سندھ اسمبلی کے اجلاس سے قبل صحافیوں سے بات چیت کر رہے تھے ۔ واضح رہے کہ انہیں جیل سے سندھ اسمبلی کے اجلاس میں لایا جاتا ہے ۔ رؤف صدیقی نے کہا کہ جیل میں مچھر اور لال چیونٹیاں ہیں ۔ اب کوئل بھی آکر کوکنے لگی ہے ۔ انہوں نے کہا کہ میں جب وزیر داخلہ سندھ تھا ، میں نے قیدیوں سے ان کے اہل خانہ کی تنہائی میں ملاقات کرانے کے لیے ’’ ملن ہاؤس ‘‘ کی تعمیر شروع کرائی تھی ۔ افسوس ناک بات ہے کہ ابھی تک یہ تعمیر مکمل نہیں ہوئی ۔ انہوں نے کہا کہ میری وزارت داخلہ کے دور میں کسی کو پیرول پر رہا نہیں کیا گیا ۔