ساہیوال(آن لائن)تحریک انصاف کے مرکزی رہنما سابق گورنر پنجاب چوہدری محمد سرور نے انکشاف کیا ہے کہ پاناما لیکس کے مسئلہ پر حکومت کو ٹف ٹائم دینے کا تحریک انصاف نے فیصلہ کر لیا ہے ۔ اور رائے ونڈ مارچ ضرور ہو کر رہے گا اور حکمرانوں کی قومی خزانہ کی جاری لوٹ سیل بند کرائینگے ۔یہ باتیں تحریک انصاف کے امیدوار این اے 162رائے مرتضیٰ اقبال کی انتخابی مہم کے ہڑپہ ،چک9-185ایل اور چک9-176ایل میں اجتماعات سے خطاب کرتے ہوئے کیں۔ اورکہا کہ اپوزیشن جماعتوں کو ساتھ لیکر چلنے کے لیے اپوزیشن لیڈر خورشید شاہ سمیت پارلیمانی پارٹیوں کے لیڈروں سے رابطہ کر لیا گیا ہے جس کے بعد مشترکہ لائح عمل کااعلان کر دیا جائے گا۔چوہدری محمد سرور نے کہا کہ پاکستان عوامی تحریک کے چیئر مین ڈاکٹر طاہر القادری کے نواز شریف کی شوگر ملز میں تین سو بھارتیوں کے کام کرنے کے انکشاف پر شوگر ملز کا ریکارڈ کا جل جانا ایک سوالیہ نشان ہے ۔ انہوں نے کہا کہ حساس اداروں کی ذمہ داریوں میں اب اور اضافہ ہو گیا ہے کہ ملک کی سا لمیت کے خلاف ہر سازش کو ناکام بنانے کے لیے یہ ضروری ہے کہ تین سو بھارتیوں کو شوگر ملز میں لانے کے لیے این او سی اتنی بھاری تعدات میں کیسے جاری ہوئے ،ریکارڈ کیو ں جلایا گیا ، اس کا نا صرف ضرب عضب کی قیادت کو نوٹس لینا چاہیے بلکہ سپریم کورٹ آف پاکستان کو ازخود نوٹس لیکر معاملہ کی شفاف تحقیقات کرائی جائے ۔ انہوں نے آخر میں کہا کہ شریف برادران کا قوم محاسبہ ضرور کریگی کیونکہ عوام حکمرانوں کی چالوں ، مہنگائی ، نت نئے وعدوں ، بیروز گاری اور ٹیکسوں کے نام پر عوام کو دبانے جیسے ہتھکنڈوں سے تنگ آچکے ہیں۔