اسلام آباد (مانیٹرنگ ڈیسک)دنیا بھر کے سیاستدان انتخابات سے قبل بلند و بانگ دعوے کرکے ووٹرز کی توجہ حاصل کرتے ہیں، لیکن بھارتی ریاست اتر پردیش کے وزیر اعلیٰ نے اب ووٹرز کی توجہ حاصل کرنے کیلئے انوکھی پیشکش متعارف کی ہے۔جی ہاں یو پی کے وزیر اعلیٰ اکھلیش یادوو نے 18سال کے نوجوانوں کو مفت اسمارٹ فون دینے کا اعلان کیا ہے لیکن ایسا صرف اس ہی صورت میں ممکن ہوسکتا ہے کہ اگلے برس ہونے والے انتخابات میں سماج وادی پارٹی ہی اقتدار میں آئے۔بھارتی میڈیا کی رپورٹس کے مطابق سالانہ 2لاکھ سے کم آمدنی والے خاندان سے تعلق رکھنے والے طلباء اسمارٹ فون حاصل کرنے کیلئے اہل ہونگے جبکہ اسمارٹ فون اگلے برس کے اختتام تک طلباء کے گھروں تک پہنچائے جائینگے۔واضح رہے کہ سماج وادی پارٹی نے 2012ءکے انتخابات سے قبل بھی اقتدار میں آکر مفت لیپ ٹاپ دینے کا اعلان کیا تھا۔