لاہور (مانیٹرنگ ڈیسک) ایگزیکٹو ممبر لاہور چیمبرز آف کامرس اینڈ انڈسٹری وانجمن تاجران لوہا مارکیٹ شہید گنج (لنڈا بازار)لاہورکے سینئر نائب صدرراجہ عدیل نے کہا ہے کہ 8سال بعد پاکستان کا ابھرتی مارکیٹوں کی فہرست میں دوبارہ شامل ہونے سے معیشت ترقی کرے گی ۔انہوںنے کہا کہ ابھرتی مارکیٹوں کی فہرست میں شامل ہونے کے پہلے ہفتے ہی پاکستان کی سٹاک مارکیٹ کے سرمائے میں2کھرب62ارب 22کروڑ 93لاکھ کا اضافہ ہوا ہے اور سٹاک مارکیٹ انڈیکس پہلی بار 38776 کی بلند ترین سطح پر پہنچ گیا ۔اس اہم مثبت پیش رفت سے غیر ملکی سرمایہ کاروں میں پاکستان کی معیشت پر اعتماد میںاضافہ ہوگا اور وہ زیادہ دلچسپی سے پاکستان کی سٹاک مارکیٹ میں سرمایہ کاری کرنے پر غور کرینگے۔
راجہ عدیل نے کہا کہ پاکستان سٹاک ایکسچینج کا مورگن سٹیٹلی کیپٹل انٹرنیشنل انڈیکس کی ابھرتی مارکیٹوں کی فہرست میںشامل ہونا اس بات کا ثبوت ہے کہ ہماری اسٹاک مارکیٹ بہتر کارکردگی کا مظاہرہ کررہی ہے اور پاکستان معیشت بحالی کی طرف گامزن ہے۔راجہ عدیل نے کہا کہ ایم ایس سی آئی ابھرتی مارکیٹوں کا انڈیکس ترقی پذیر ممالک میں سرمایہ کاروں کی طرف سے سب سے زیادہ استعمال ہونے والا انڈیکس ہے اور پاکستان کی اس انڈیکس میں شمولیت سے ہماری سٹاک مارکیٹ مزید مضبوط ہوگی اس پیش رفت سے کیپٹل مارکیٹ کے ذریعے پیداواری شعبوں میں سرمایہ کاری میں بھی اضافہ ہوگا کیونکہ سٹاک مارکیٹ پر درج ہونے والی کمپنیاں مشینری پلانٹس میں سرمایہ کاری کرنے کیلئے مارکیٹ سے فنڈز اکٹھا کرتی ہیں اس میں غیر ملکی سرمایہ کار ی میں بھی اضافہ ہوگا۔جس سے ملک کے زرمبادلہ کے ذخائر بھی بڑھیں گے۔