لاہور (این این آئی ) مسلح ڈاکوؤں نے چیئرمین عام عوام پارٹی سہیل ضیاء بٹ کو موبائل فونز اور نقدی سے محروم کر دیا ۔ بتایاگیا ہے کہ مسلح ڈاکوؤں نے گارڈن ٹاؤن میں واقع عام عوام پارٹی کے مرکزی دفتر میں چیئرمین سہیل ضیاء بٹ سے 2موبائل فونز اور نقدی لوٹ لی اور فرار ہو گئے ۔ پولیس نے درخواست ملنے پر ڈکیتی کی واردات کا مقدمہ درج کرلیا ہے ۔سہیل ضیاء بٹ کا کہنا تھا کہ اللہ کا شکر ہے کہ میری زندگی بچ گئی ۔انہوں نے مزید کہا کہ واردات کے ذریعے مجھے پیغام دیا گیا ہے لیکن میں اپنے مقصد سے پیچھے نہیں ہٹوں گا۔عام عوام پارٹی کا کاررواں لوگوں کی فلاح و بہبود کے لئے آگے بڑھتا رہے گا۔اس قسم کے اوچھے ہتھکنڈوں سے ڈرنے والا نہیں ہوں۔واضح رہے کہ مسلم لیگ (ن) کے دیرینہ کارکن سہیل ضیا بٹ نے ’’عام عوام پارٹی ‘‘کے نام سے سیاسی جماعت بنانے کا اعلان کرتے ہوئے کہا ہے کہ جمہوریت کی خاطر فوج ہمارا ساتھ دے ، موروثی سیاست کا راستہ بند کر دیں گے ، پرانا ایک بھی سیاستدان ہماری پارٹی کا ٹکٹ حاصل نہیں کر سکے گا ، لینڈ کروزر والے عام عوام پارٹی کے کارکنوں سے شکست کھائیں گے ، غریبوں کی حمایت کے صرف نعرے نہیں بلکہ عملی طور پر کچھ کر کے دکھائیں گے ۔ ان خیالات کا اظہار انہوں نے گزشتہ روز اپنی پارٹی کے کارکنوں کے اعزاز میں دیئے گئے افطار ڈنر کے موقع پر خطاب کرتے ہوئے کیا ۔ سہیل ضیاء بٹ نے کہا کہ پاکستان کی سیاست میں لوگ جتنے بڑے عہدوں پر ہوتے ہیں اتنے ہی بڑے منافق ہوتے ہیں ۔اگر لوگوں کو تعلیم ، صحت ، صاف پانی اور نصاف ہی نہیں مل رہا تو صرف سڑکیں اور پل بنانے کا کیا فائدہ ہے ۔ اب نہ تخت رہیں گے اور نہ تاج رہیں گے ، صرف خلق خدا راج کرے گی ۔ انہوں نے کہا کہ 40سال تک مسلم لیگ (ن) کی اپنی ماں کی طرح خدمت کی لیکن مجھے ان سے پارٹی کارکن ہونے کی حیثیت سے کوئی شکوہ اور نہ ہی شکایت ہے ۔ انہوں نے عام عوام پارٹی کے نام سے اپنی جماعت بنانے کا اعلان کرتے ہوئے کہا کہ حقیقی عوامی فلاحی و بہبود کے لئے پارٹی بنائی ہے جو نئی تاریخ رقم کرے گی ، پرانا ایک بھی سیاستدان ہماری پارٹی کا ٹکٹ حاصل نہیں کر سکے گا ، اپنی جماعت کا باضابطہ اعلان رمضان المبارک کے دوران ہی کروں گا اور جمہوریت کی خاطر فوج کو دعوت دیتے ہیں کہ عام عوام پارٹی کا ساتھ دیں ۔سہیل ضیاء بٹ کا کہنا تھا کہ ملک میں صرف اور صرف موروثی سیاست چل رہی ہے ، زرداری کے بعد اسکا بیٹا ، نواز شریف کے بعد اسکی بیٹی ، پرویز الٰہی کے بعد اسکا بیٹا اور سہیل ضیاء بٹ کے بعد اسکا بیٹا ۔ باپ ایم این اے ہے تو بیٹے کو ایم پی اے بنوا رکھا ہے لیکن اب روایت توڑ کر یہ باب بند کر دیں گے اور لینڈ کروزر پر گھومنے والے عام عوام پارٹی کے کارکنوں سے شکست کھائیں گے ۔ انہوں نے مزید کہاکہ ہم غریبوں کی حمایت کا صرف نعرہ ہی نہیں لگائیں گے بلکہ عملی طور پر بھی کر کے دکھائیں گے ۔ سرمایہ دار ، جاگیر دار ،مفاد پرست اور اداکار سیاستدانوں کے تمام راستے بند کردیں گے ۔