اسلام آباد (این این آئی)وزیر داخلہ چودھری نثار علی خان نے زیر تفتیش گرفتار ملزمان کی ویڈیوز کی تشہیر کو غیرقانونی اور غیراخلاقی قرار دیتے ہوئے سندھ حکومت سے معاملے کی تحقیقات کرنے کا کہہ دیا ۔ایک بیان میں وزیرداخلہ نے کہاکہ زیرتفتیش گرفتار شدگان کی ویڈیوز کی تشہیر کرنا غیر قانونی اور غیر اخلاقی امر ہے ٗ مقدمات کا فیصلہ عدالتوں میں ہونا ہے ، میڈیا ٹرائل کے ذریعے نہیں انہوں نے کہاکہ اس قسم کی غیر ضروری تشہیر مقدمات کو مضبوط کرنے کی بجائے کمزور کرتی ہے۔وزیرداخلہ نے کہاکہ سندھ حکومت کو لکھ رہے ہیں کی وہ تحقیق کرے کہ اس قسم کے واقعات کے پیچھے کون سے تفتیشی ادارے کا ہاتھ ہے ؟پیمرا کو بھی علیحدہ خط لکھا جا رہا ہے جس میں ایسے واقعات کے سدباب کے لئے ایک ضابطہ اور طریقہ کار طے کرنے کیلئے کہا جائیگا۔