کراچی(این این آئی)رواں مالی سال کے گیارہ ماہ میں براہ راست غیرملکی سرمایا کاری 1 ارب ڈالر رہی ، ملک میں ہونے والی مجموعی سرمایہ کاری کا 50 فیصد حصہ چین نے لگایا ۔جولائی سے مئی کے دوران غیرملکی براہ راست سرمایہ کاری میں ساڑھے 10 فیصد اضافہ ہوا ۔ اسٹیٹ بینک کے مطابق گیارہ ماہ کے دوران براہ راست غیرملکی سرمایہ کاری 1 ارب ڈالر تک پہنچ گئی ۔ اس عرصے میں چین نے دوست ملک کا کردار ادا کرتے ہوئے 57 کروڑ ڈالر کی سرمایہ کاری سے تمام ممالک کو پیچھے چھوڑ دیا ۔دوسری جانب اسٹاک مارکیٹ بیرون سرمایہ کاروں کی عدم توجہی کا شکار رہی ، جولائی سے مئی کے دوران سرمایہ کاروں نے 38 کروڑ ڈالر کے حصص فروخت کر ڈالے ۔اس طرح مالی سال 16-2015 کے گیارہ ماہ میں مجموعی غیرملکی سرمایہ کاری 75 فیصد کمی سے 68 کروڑ ڈالر رہی جبکہ گذشتہ سال کے اسی عرصے کے دوران غیرملکی سرمایہ کاری کا حجم 2 ارب 80 کروڑ ڈالر تھا ۔