اسلام آباد(مانیٹرنگ ڈیسک) پاکستان کے دیرینہ دوست چین کا پاکستان کی اقتصادی ترقی منصوبوں میں ایک اور شاندار اضافہ ، چین نے گوادر تا کاشغر تیل کی ترسیل کیلئے پائپ لائن کی تعمیر کا فیصلہ کر لیا، رپورٹ کے مطابق چین اس منصوبے پر 2017ء میں کام شروع کر دے گا۔ تیل سپلائی منصوبہ پاکستان اور چین کے درمیان تعلقات کے مزید استحکام میں بڑی پیش رفت ثابت ہوگا۔ گوادر تا کاشغر منصوبے سے مشرق وسطیٰ کے تیل کی چائنہ تک رسائی کافی حد تک آسان ہو جائیگی۔پراجیکٹ کیلئے فنڈز چینی حکومت اور فرنٹیئر ورکس آرگنائزیشن (ایف ڈبلیو او) ادا کریں گے۔
رپورٹ کے مطابق متذکرہ بالا منصوبہ چین کے سلک روٹ کی بحالی کے منصوبے کا حصہ ہے ‘ چین سلک روٹ منصوبہ ایف ڈبلیو او نے تعمیر کیا تھا۔گوادر تا کاشغر تیل ترسیل منصوبے کی لمبائی، روٹ اور لاگت کے بارے میں ابھی حتمی تفصیلات جاری نہیں کی جا سکیں۔ گوادر خلیج فارس کے قریب واقعہ ہے‘خلیج فارس سے 17 ارب بیرل تیل کے ذخائر کی ترسیل روزانہ کی جاتی ہے۔ منصوبہ 3000 کلومیٹر پاک چائنہ اقتصادی راہداری کو گوادر سے ملائے گا۔ واضح رہے کہ چین کو بھاری مقدار میں تیل دوسرے ممالک سے درآمد کرنا پڑتا ہے جس کی مد میں چین کا کثیر سرمایہ خرچ ہوتا ہے۔ گوادرسے کاشغر کے راستے چین کو تیل کی ترسیل سے 2500 کلومیٹر کم فاصلہ طے کرنے کا فائدہ ہوگا۔ سی پیک منصوبے سے چین کو وقت کے ساتھ لاکھوں ڈالرز کی بھی یقینی بچت ہوگی‘ چینی گوادر میں بڑا انڈسٹریل پارک تعمیر کرینگے جہاں آئل سٹی اور پٹرولیم ریفائننگ زون بھی قائم کئے جائیں گے۔