لاہور(آن لائن)خیبرپختون خواہ کے عوام عمران خان سے مایوس ہیں۔خیبرپختون خواہ کی ترقی کے لئے تحریک انصاف نے کچھ نہیں کیا ۔خیبرپختون خواہ کے بجٹ میں بھی عوام کو ریلیف نہیں ملے گا۔تاہم پنجاب کا بجٹ’’کے پی کے‘‘ سے ہزار گنا بہتر ہوگا، آن لائن کے سوال کے جواب میں صوبائی دارالحکومت سے تعلق رکھنے والے ایم پی ایز،ضلع سیالکوٹ سے تعلق رکھنے والے ایم پی ایز اور گوجرانوالہ ، شیخوپورہ،قصور اور منڈی بہاؤالدین سے کامیاب ہونے والے لیگی رہنماؤں کے مطابق وزیر اعلیٰ پنجاب کی انتھک محنت اور درست سمت پالیسیوں کی وجہ سے سال 2018تک پنجاب میں شرح ترقی میں 8فیصد تک اضافے کا ہدف حاصل کیا جائے گا اور صوبے کی معیشت کا حجم بڑھایا جائے گا۔ 40لاکھ معیاری روز گار کے نئے مواقع پیدا کئے جائیں گے۔ صوبے میں 20لاکھ نوجوانو ں کومارکیٹ کی ضروریات کے مطابق مختلف فنون کی تربیت دی جائے گی،پنجاب کی برآمدات میں ہر سال 15فیصد اضافہ کیا جائے گا جبکہ 2018تک پنجاب میں نجی شعبہ کی سرمایہ کاری کا ہدف 17.5ارب ڈالر مقرر کیا گیاہے۔پنجاب گروتھ سٹریٹجی 2018 وژن 2025سے مطابقت رکھتی ہے۔ ایم پی ایز کے مطابق ملک کی تاریخ کے سب سے بڑے تعلیمی فنڈ کے ذریعے ایک لاکھ ایسے ذہین بچے اپنی تعلیمی پیاس بجھا رہے ہیں جن کے والدین اپنے بچوں کو زیور تعلیم سے آراستہ کرنے کیلئے وسائل نہیں رکھتے۔