اسلام آباد (نیوزڈیسک) مسلم لیگ ن کے رہنما، سابق ایم این اے اور میٹرو بس سروس کے چیئرمین حنیف عباسی نے کہا ہے کہ میرے خلاف ہر دور میں ایک مخصوص طبقہ نے جھوٹا پروپیگنڈہ کیا لیکن آخر میں ان کا منہ کالا ہوا۔ انہوں نے کہا کہ میں اس بات کی پرزور تردید کرتا ہوں کہ نہ ہی میرا کسی مضاربہ سیکنڈل سے یا کسی چینی سیکنڈل سے تعلق ہے۔ ان خیالات کا اظہار انہوں نے نیشنل پریس کلب میں ایک پرہجوم پریس کانفرنس سے خطاب کرتے ہوئے کیا۔ ان کا کہنا تھا کہ ہم نے جس کمپنی سے 21 لاکھ کا جنریٹر خریدا وہ بطور فیکٹری پلانٹ منیجر کے درمیان طے ہونے والے معاہدہ کے تحت 27 لاکھ روپے میں خریدا تھا۔ جس کی پہلی قسط مبلغ 10 لاکھ روپے چیک کی صورت میں ادا کی اور باقی 17 لاکھ روپے کی رقم نیب کے چیئرمین کے اکاؤنٹس میں منتقل کی۔ انہوں نے کہا کہ جھوٹے پروپیگنڈے سے اجتناب کیا جائے اور ایسی من گھڑت اور جھوٹی، بغیر تصدیق شدہ خبریں شائع کرنے سے اجتناب کیا جائے۔ اس حوالے سے پیمرا کے پاس جاؤں گا اگر وہاں سے داد رسی نہ ہوئی تو اعلیٰ عدالتوں کا دروازہ کھٹکھٹاؤں گا۔ انہوں نے مزید کہا کہ مخالفین نے 2009 میں بھی مجھے بے نظیر قتل کیس میں بھی پھنسانے کی کوشش کی گئی لیکن اللہ تعالیٰ نے سرخروکیا میں کسی شخص سے نہیں ڈرتا۔ اللہ تعالیٰ پر مکمل بھروسہ ہے عزت و ذلت اس کے اختیار میں ہے۔ ایفی ڈرین کیس ہو یا میٹرو کیس ہر کسی قسم کے جھوٹے پروپیگنڈے کا خندہ پیشانی سے مقابلہ کیا۔