تہران(نیوز ڈیسک)ایران میں ایک ہوٹل مکمل طور پر نمک سے بنا ہے جو دیکھنے میں ایک عجیب شاہکار ہے لیکن اسے بنانے والوں کا اصرار ہے کہ یہاں قیام صحت کے لیے بھی بہت مفید ہے۔ایران کے شہر شیراز کا یہ ہوٹل 150 مربع میٹر پر قائم کیا گیا جسے ایرانی کمپنی امتیاز ڈیزائننگ گروپ کے ماہرین نے تعمیر کیا جس کا بنیادی مٹیریل نمک ہے۔ اس کی ہر شے نمک سے بنی ہے خواہ وہ میز ہو یا کرسیاں اور یہاں وقت گزارنے والے افراد کی صحت پراچھے اثرات مرتب ہوتے ہیں۔ ہم جانتے ہیں کہ نمک ہوا کو صاف کرتا ہے اور اپنی اطراف مثبت آئن خارج کرتا ہے۔ اسی طرح سانس کے مریضوں کو نمک کی کان میں کچھ وقت گزارنے کو کہا جاتا ہے جس سے ان کی طبیعیت کچھ بہتر ہوجاتی ہے۔نمکین ریسٹورینٹ کے لیے نمک کی مضبوط اقسام کا انتخاب کیا گیا تاکہ ان سے دیواریں تعمیرکی جاسکیں۔ کئی جگہوں پر نمک کو پروسیس کرکے اسے جوڑنے کے لیے بھی سفید مٹیریل لگایا گیا ہے۔ شام ہوتے ہی اس ریسٹورینٹ میں لوگوں کی بڑی تعداد آتی ہے اور نمک زدہ ماحول میں لذیذ کھانوں سے لطف اندوز ہوتے ہیں۔