اسلام آباد (نیوز ڈ یسک)معروف ٹی وی اینکر اور پاکستان عوام راج تحریک کے سربراہ اقرار الحسن کی ضمانت پر رہائی کے بعد پہلی ویڈیو سوشل میڈیا پر سامنے آگئی ہے۔

انہیں کراچی کی سینٹرل جیل سے رہائی ملنے کے بعد اہلخانہ اور مداحوں نے خوش آمدید کہا۔کراچی کی جوڈیشل مجسٹریٹ عدالت نے پیکا ایکٹ کے تحت سوشل میڈیا پر مبینہ ریاست مخالف مواد سے متعلق درج مقدمے میں اقرار الحسن کی ضمانت منظور کی تھی۔ عدالت نے انہیں 2 لاکھ روپے کے ضمانتی مچلکے جمع کرانے کے عوض رہا کرنے کا حکم دیا۔ اس سے قبل ان کی ضمانت کی درخواست مسترد ہوگئی تھی، تاہم بعد ازاں قانونی کارروائی کے نتیجے میں رہائی کا پروانہ جاری کردیا گیا۔

رہائی کے بعد منظر عام پر آنے والی ویڈیو میں دیکھا جاسکتا ہے کہ اقرار الحسن جب سینٹرل جیل سے باہر روانہ ہوئے تو معروف اینکر وسیم بادامی گاڑی چلا رہے تھے، جبکہ اقرار الحسن ان کے ساتھ اگلی نشست پر موجود تھے۔اس موقع پر جیل کے باہر موجود صحافیوں اور مداحوں نے انہیں رہائی پر مبارکباد دی اور مختلف سوالات کرنے کی کوشش بھی کی۔ تاہم اقرار الحسن نے مختصر جواب دیتے ہوئے کہا کہ وہ جلد سب سے تفصیلی گفتگو کریں گے۔