اسلام آباد (نیوز ڈیسک)موبائل فونز پر عائد بھاری پی ٹی اے ٹیکس سے پریشان صارفین کے لیے بڑی سہولت سامنے آگئی،

درآمد شدہ اسمارٹ فونز کے ٹیکس کی ادائیگی اب آسان ماہانہ اقساط میں کرنے کا راستہ ہموار ہوگیا ہے۔

پاکستان پیپلز پارٹی کے رکن قومی اسمبلی قاسم گیلانی نے سوشل میڈیا پر اپنے بیان میں اس پیش رفت کو عوام کے لیے اہم ریلیف قرار دیتے ہوئے بتایا کہ درآمد شدہ اسمارٹ فونز پر ٹیکس کے طریقہ کار میں نمایاں تبدیلی لائی گئی ہے۔ ان کے مطابق ریگولیٹری ڈیوٹی کی مد میں بھی تقریباً 18 ہزار روپے تک کمی ہوئی ہے۔

قاسم گیلانی کا کہنا تھا کہ اس سے قبل شہریوں کو موبائل فون استعمال کرنے کے لیے ایک لاکھ سے ڈھائی لاکھ روپے تک کا پی ٹی اے ٹیکس یکمشت ادا کرنا پڑتا تھا، جو عام صارف کے لیے خاصا مشکل بن چکا تھا۔

انہوں نے بتایا کہ نئی سہولت کے تحت اب صارفین کو بھاری رقم ایک ہی مرتبہ ادا کرنے کی ضرورت نہیں ہوگی۔ موبائل فون کا پی ٹی اے ٹیکس 8 ہزار سے 17 ہزار روپے تک ماہانہ آسان اقساط میں ادا کیا جاسکے گا، جس کے بعد صارفین اپنے فون استعمال کرسکیں گے۔

رکن قومی اسمبلی کے مطابق موجودہ دور میں اسمارٹ فون اور انٹرنیٹ روزمرہ زندگی کے ساتھ ساتھ تعلیم اور پیشہ ورانہ سرگرمیوں کے لیے بھی اہم ضرورت بن چکے ہیں۔ ان پر زیادہ ٹیکسوں کے باعث بالخصوص نوجوانوں اور مختلف شعبوں سے وابستہ افراد کو مالی مشکلات کا سامنا تھا۔

قاسم گیلانی نے مزید کہا کہ عوام کو ملنے والے اس ریلیف کو حتمی قدم نہیں سمجھا جائے گا، بلکہ ٹیکنالوجی اور ڈیجیٹل آلات تک شہریوں کی رسائی آسان بنانے کے لیے مزید سہولتیں اور رعایتیں حاصل کرنے کی کوششیں جاری رکھی جائیں گی۔

اس کے علاوہ ریگولیٹری ڈیوٹی (RD) کی مد میں ٹیکس میں بھی تقریباً 18 ہزار روپے کی کمی ہوئی ہے۔

— Kasim Gilani (@KasimGillani) September 14, 2026