ااسلام آباد(نیوز ڈ یسک)قومی بچت نے مختلف سیونگ اسکیموں پر منافع کی شرحوں میں تبدیلی کردی ہے،

جس کے نتیجے میں بیشتر اسکیموں کے منافع میں کمی واقع ہوئی ہے، تاہم ایک سالہ شارٹ ٹرم سیونگ سرٹیفکیٹ کی شرح میں معمولی اضافہ کیا گیا ہے۔نئی شرحوں کے تحت پنشنرز بینیفٹ اکاؤنٹ اور بہبود سیونگ سرٹیفکیٹس پر منافع 36 بیسس پوائنٹس کم ہوکر 12.60 فیصد ہوگیا ہے۔اسی طرح ریگولر انکم سرٹیفکیٹس کی شرح میں بھی 36 بیسس پوائنٹس کی کمی کی گئی ہے، جس کے بعد منافع کی نئی شرح 11.16 فیصد مقرر کی گئی ہے۔ سپیشل سیونگ اکاؤنٹ پر منافع 30 بیسس پوائنٹس گھٹ کر 10.90 فیصد ہوگیا۔3 ماہ کے شارٹ ٹرم سیونگ سرٹیفکیٹس کی منافع کی شرح 26 بیسس پوائنٹس کم ہونے کے بعد 10.86 فیصد رہ گئی ہے،

جبکہ 6 ماہ کے شارٹ ٹرم سرٹیفکیٹس پر شرح 28 بیسس پوائنٹس کی کمی کے بعد 10.86 فیصد کردی گئی ہے۔دوسری جانب ایک سالہ شارٹ ٹرم سیونگ سرٹیفکیٹ سرمایہ کاروں کیلئے قدرے بہتر خبر لایا ہے، جس کی شرحِ منافع میں 11 بیسس پوائنٹس کا اضافہ کیا گیا ہے۔ اضافے کے بعد اس اسکیم پر منافع کی شرح 11.28 فیصد ہوگئی ہے۔نوٹیفکیشن کے مطابق منافع کی یہ نئی شرحیں فوری طور پر نافذ العمل ہوں گی۔ شرحوں میں تبدیلی سے بالخصوص وہ سرمایہ کار متاثر ہوں گے جو اپنی آمدن کیلئے قومی بچت کی فکسڈ انکم اسکیموں پر انحصار کرتے ہیں۔