اسلام آباد (نیوز ڈیسک) ملک میں اسمارٹ میٹرز کی تنصیب کے منصوبے پر عملدرآمد جاری ہے اور اب تک بجلی کی تقسیم کار کمپنیوں کے مختلف علاقوں میں 21 لاکھ 25 ہزار 296 جدید میٹرز نصب کیے جاچکے ہیں۔

وزارت توانائی کی جانب سے سینیٹ میں جمع کرائے گئے تحریری جواب میں بتایا گیا ہے کہ ملک کی مختلف ڈسکوز میں اسمارٹ میٹرز کی تنصیب کا عمل جاری ہے اور اس حوالے سے تازہ اعداد و شمار بھی ایوان کو فراہم کیے گئے ہیں۔

دستیاب اعداد و شمار کے مطابق لیسکو اسمارٹ میٹرز لگانے کے حوالے سے سب سے آگے ہے، جہاں اب تک 11 لاکھ 53 ہزار 556 میٹرز نصب کیے جاچکے ہیں۔ گیپکو کے علاقوں میں 3 لاکھ 48 ہزار 135 جبکہ میپکو میں 2 لاکھ 29 ہزار 719 اسمارٹ میٹرز لگائے گئے ہیں۔

اسی طرح آئیسکو کے صارفین کے لیے ایک لاکھ 19 ہزار 372، فیسکو میں ایک لاکھ 11 ہزار 948 اور پیسکو کے علاقوں میں 60 ہزار 685 اسمارٹ میٹرز نصب کیے گئے ہیں۔

اعداد و شمار کے مطابق کے الیکٹرک کے زیر انتظام علاقوں میں 50 ہزار 599، حیسکو میں 19 ہزار 620 جبکہ سیپکو میں 13 ہزار 432 اسمارٹ میٹرز لگ چکے ہیں۔

دوسری جانب کیسکو کے علاقوں میں 9 ہزار 194، ہزیکو میں 7 ہزار 659 اور ٹیسکو کے مختلف علاقوں میں ایک ہزار 377 اسمارٹ میٹرز نصب کیے گئے ہیں۔

وزارت توانائی کے مطابق اس جدید میٹرنگ سسٹم کے ذریعے بجلی کے استعمال کی نگرانی زیادہ مؤثر بنائی جاسکے گی۔ اس کے علاوہ میٹر ریڈنگ میں بہتری، صارفین کے بجلی استعمال سے متعلق درست معلومات کے حصول اور تقسیم کار کمپنیوں کی کارکردگی کی نگرانی میں بھی مدد ملے گی۔

حکام کے مطابق اسمارٹ میٹرز بجلی کے استعمال کا ڈیٹا بہتر انداز میں فراہم کرنے کی صلاحیت رکھتے ہیں، جس سے بجلی کی تقسیم، نگرانی اور انتظامی نظام کو جدید تقاضوں کے مطابق بہتر بنانے میں معاونت ملے گی۔

وزارت توانائی کا کہنا ہے کہ ملک کے مختلف علاقوں میں اسمارٹ میٹرز کی تنصیب کا سلسلہ جاری ہے اور مستقبل میں اس جدید نظام کے دائرہ کار کو مزید وسعت دی جائے گی۔