اسلام آباد (نیوز ڈیسک) ایران میں قدرتی گیس کے وسیع ذخائر کی نئی دریافت ہوئی ہے، جسے ملکی توانائی کے شعبے کے لیے اہم پیش رفت قرار دیا جا رہا ہے۔

ایرانی خبر رساں ادارے کے مطابق جنوبی صوبہ فارس میں دریافت ہونے والے نئے گیس فیلڈ میں 7.5 ٹریلین کیوبک فٹ سے زائد قدرتی گیس موجود ہونے کا اندازہ لگایا گیا ہے۔

ایرانی وزیر تیل محسن پاک نژاد نے بتایا کہ اس ذخیرے میں سے تقریباً 5.7 ٹریلین کیوبک فٹ گیس قابلِ حصول ہے۔ ان کے مطابق یہ مقدار ایران کے بڑے گیس فیلڈ جنوبی پارس کے ایک مرحلے سے تقریباً 15 سال تک حاصل ہونے والی پیداوار کے برابر ہے۔

وزیر تیل کا کہنا تھا کہ نئے دریافت ہونے والے فیلڈ میں موجود گیس سویٹ گیس ہے، جس کے باعث اس کی ترقی اور پیداوار کے اخراجات نسبتاً کم رہنے کی توقع ہے۔

انہوں نے مزید بتایا کہ گیس کے علاوہ نئے فیلڈ میں گیس کنڈینسیٹ کے بھی قابلِ ذکر ذخائر موجود ہیں۔ حکام کے مطابق ان ذخائر کی ترقی سے ایران کو مستقبل میں اربوں ڈالر کی اضافی آمدنی حاصل ہونے کی امید ہے۔