لاہور (این این آئی)سولر صارفین کو جنریشن لائسنس کے اجراء میں غیر معمولی تاخیر کا سامنا ہے، نیٹ بلنگ پالیسی کے تحت متعدد صارفین ایک ماہ گزرنے کے باوجود لائسنس کے منتظر ہیں۔

ذرائع کے مطابق لیسکو نے سولر جنریشن لائسنس کے اجرا کے لیے سیکڑوں صارفین کی درخواستیں نیپرا کو ارسال کر رکھی ہیں تاہم نیپرا کی جانب سے ایک ماہ تک متعدد درخواستوں پر لائسنس جاری نہیں کیے جاسکے۔لیسکو نے 25کلوواٹ سے زائد سولر سسٹم رکھنے والے صارفین کی درخواستیں نیپرا کو بھجوائی ہیں، جن میں کمرشل، صنعتی اور دیگر صارفین بھی شامل ہیں۔ اس کے علاوہ 25کلوواٹ سے کم لوڈ والے کنکشنز سے متعلق دستاویزات بھی نیپرا کو ارسال کی گئی ہیں۔

ذرائع کے مطابق نیپرا ریگولیشنز میں تبدیلی کے باوجود 25کلوواٹ سے کم سولر سسٹم سے متعلق متعدد درخواستیں بھی تاحال منجمد ہیں۔ نیپرا کی جانب سے درخواستیں منظور یا مسترد ہونے کے بعد ہی لیسکو مزید کارروائی عمل میں لاسکے گا۔