اسلام آباد (نیوز ڈیسک) ’’ارشد چائے والا‘‘ کے نام سے شہرت حاصل کرنے والے کاروباری شخصیت ارشد خان نے پاسپورٹ کی تجدید نہ ہونے پر اسلام آباد ہائیکورٹ سے رجوع کرلیا ہے۔

ارشد خان کی جانب سے بیرسٹر عمر اعجاز گیلانی کے توسط سے عدالت میں درخواست دائر کی گئی ہے، جس میں مؤقف اپنایا گیا کہ درخواست گزار ایک معروف کاروباری شخصیت ہیں اور بین الاقوامی سطح پر پاکستان کی ثقافت کو اجاگر کرنے میں بھی کردار ادا کرچکے ہیں۔درخواست میں بتایا گیا کہ نادرا کے ویری فکیشن بورڈ کی جانب سے ارشد خان کا شناختی کارڈ کلیئر کیا جاچکا ہے اور ان کا شناختی کارڈ تاحال فعال ہے۔عدالت میں دائر درخواست کے مطابق ارشد خان نے 23 اگست 2025 کو اپنے پاسپورٹ کی تجدید کے لیے متعلقہ حکام کو درخواست دی تھی، تاہم تقریباً ایک سال گزرنے کے باوجود انہیں نیا پاسپورٹ جاری نہیں کیا گیا۔درخواست گزار کا کہنا ہے کہ پاسپورٹ کے حصول کے لیے انہوں نے کئی مرتبہ سیکرٹری داخلہ کے دفتر سے رابطہ کیا، لیکن مسئلہ حل نہیں ہوسکا۔ ان کی جانب سے متعلقہ حکام کو قانونی نوٹس بھی ارسال کیا گیا،

تاہم اس کا بھی کوئی جواب موصول نہیں ہوا۔ارشد خان نے عدالت سے استدعا کی ہے کہ متعلقہ حکام کو ان کا تجدید شدہ پاسپورٹ جاری کرنے کا حکم دیا جائے۔ درخواست میں پاسپورٹ جاری نہ کرنے کے اقدام کو غیر قانونی اور بنیادی حقوق سے متصادم قرار دینے کی بھی درخواست کی گئی ہے۔مقدمے میں ڈائریکٹر جنرل امیگریشن اینڈ پاسپورٹس جبکہ وفاق کو سیکرٹری داخلہ کے ذریعے فریق بنایا گیا ہے۔