اسلام آباد (نیوز ڈیسک) متحدہ عرب امارات میں مقیم پاکستانیوں کے لیے نادرا نے شناختی دستاویزات سے متعلق خصوصی سہولت کا اعلان کر دیا ہے،

جس کے تحت مختلف شہروں میں موبائل رجسٹریشن سروس فراہم کی جا رہی ہے۔نادرا کے مطابق ایسے پاکستانی شہری جنہیں نیا نائیکوپ بنوانا ہو، شناختی دستاویزات کی تجدید، ترمیم، ری پرنٹ یا منسوخی کرانی ہو، انہیں دفاتر کے چکر لگانے کی ضرورت نہیں ہوگی۔ یہ تمام خدمات موبائل رجسٹریشن کیمپ کے ذریعے ان کے قریب دستیاب ہوں گی۔

اعلامیے میں بتایا گیا ہے کہ نادرا کی موبائل رجسٹریشن ٹیم پاکستان قونصلیٹ کے عملے کے ساتھ مل کر متحدہ عرب امارات کا دورہ کر رہی ہے تاکہ اوورسیز پاکستانیوں کو آسان اور بروقت خدمات فراہم کی جا سکیں۔اس سلسلے میں ہفتہ 8 اگست کو صبح 8 بجے سے شام 4 بجے تک فجیرہ میں الاسماء ٹرانسپورٹ اینڈ کمپنی، الہیل روڈ پر خصوصی کیمپ قائم کیا جائے گا۔اس کیمپ میں پاکستانی شہری نائیکوپ کے اجرا، تجدید، ری پرنٹ، معلومات میں ترمیم، شناختی ریکارڈ کی درستگی، منسوخی اور فیملی رجسٹریشن سرٹیفکیٹ (FRC) سمیت مختلف نادرا خدمات سے استفادہ کر سکیں گے۔ نادرا نے پاکستانی شہریوں کو ہدایت کی ہے کہ مطلوبہ دستاویزات کے ساتھ مقررہ مقام پر پہنچ کر اس سہولت سے فائدہ اٹھائیں۔