اسلام آباد (نیوز ڈیسک)جرمنی میں افرادی قوت کی کمی کو پورا کرنے کے لیے مختلف شعبوں میں غیر ملکی ہنر مند افراد کے لیے روزگار کے نئے مواقع فراہم کیے جا رہے ہیں۔
اس مقصد کے تحت جرمن حکام نے ملازمت، ویزا، رہائش اور درخواست کے عمل سے متعلق تفصیلی معلومات بھی جاری کر دی ہیں۔
حکام کے مطابق صحت، میڈیکل ٹیکنالوجی، تعلیم، سیاحت، ہوٹل مینجمنٹ اور ریسٹورنٹ انڈسٹری سمیت کئی شعبوں میں تجربہ کار اور تربیت یافتہ افراد کی مانگ میں نمایاں اضافہ ہوا ہے۔
صحت کے شعبے میں ڈینٹل اسسٹنٹس، میڈیکل اسسٹنٹس، فزیوتھراپسٹس، ویٹرنری اسسٹنٹس، فارماسسٹس، ریڈیالوجی ٹیکنیشنز، سرجیکل ٹیکنالوجسٹ، اینستھیزیا اسسٹنٹس، پیرا میڈیکس، ایمرجنسی میڈیکل ٹیکنیشنز اور پاؤں کے امراض کے ماہرین کے لیے روزگار کے مواقع موجود ہیں۔
اسی طرح میڈیکل ٹیکنالوجی کے میدان میں ڈینٹل ٹیکنیشنز، آرتھوپیڈک ٹیکنیشنز، آپٹیشنز اور ہیئرنگ ایڈ اسپیشلسٹس کی بھی ضرورت برقرار ہے۔ دوسری جانب ہوٹلنگ اور سیاحت کے شعبے میں ہوٹل مینیجرز، ریسٹورنٹ اسپیشلسٹس، کیٹرنگ ماہرین اور شیفس کی بھرتیاں جاری ہیں، جبکہ تعلیمی اداروں میں اساتذہ، ایجوکیٹرز اور سوشل ورکرز کے لیے بھی ملازمتوں کے مواقع دستیاب ہیں۔
جرمن حکام نے واضح کیا ہے کہ درخواست دینے والے امیدواروں کے پاس تسلیم شدہ تعلیمی ڈگری یا متعلقہ شعبے میں پیشہ ورانہ تربیت ہونا لازمی ہے، جسے جرمنی کے مقررہ معیار کے مطابق تسلیم کیا جاتا ہو۔
ماہرین کا کہنا ہے کہ امیدوار درخواست دینے سے پہلے اپنی تعلیمی اسناد، پیشہ ورانہ قابلیت اور ویزا سے متعلق تمام شرائط کی اچھی طرح جانچ کر لیں تاکہ درخواست کا عمل بغیر کسی رکاوٹ کے مکمل ہو سکے۔
مزید معلومات، دستیاب ملازمتوں اور درخواست کے طریقہ کار سے آگاہی کے لیے امیدوار جرمنی کے سرکاری روزگار پورٹل سے رہنمائی حاصل کر سکتے ہیں۔
