لاہور (این این آئی)پنجاب حکومت نے گندم کی نئی ریلیز پرائس مقرر کرتے ہوئے فی من قیمت 3ہزار 800روپے کر دی ۔

محکمہ فوڈ سیفٹی اینڈ کنزیومر پروٹیکشن پنجاب کی جانب سے گندم کی نئی ریلیز پرائس کا نوٹیفکیشن جاری کر دیا گیا ہے۔ پنجاب کابینہ کی منظوری کے بعد نئی قیمت کا باقاعدہ اطلاق شروع ہو گیا ہے۔محکمہ فوڈ سیفٹی پنجاب کے ترجمان کے مطابق وفاقی حکومت نے پنجاب کو پاسکو سے گندم کی فوری خریداری کی ہدایت جاری کی ہے جبکہ صوبے کو پاسکو سے مزید 3لاکھ میٹرک ٹن گندم کی فراہمی کی منظوری بھی دے دی گئی ہے۔ترجمان کے مطابق محکمہ فوڈ سیفٹی پنجاب پاسکو سے 2لاکھ میٹرک ٹن گندم پہلے ہی حاصل کر چکا ہے، جبکہ پاسکو سے حاصل کی جانے والی گندم کی قیمت 4ہزار 150روپے فی 40کلوگرام مقرر کی گئی ہے۔

محکمہ فوڈ سیفٹی نے بتایا کہ ای سی سی کے 28جنوری 2026 ء کے فیصلے پر عملدرآمد کے لیے ہدایات بھی جاری کر دی گئی ہیں۔حکومت پنجاب نے صوبے میں آٹے اور گندم کی مسلسل فراہمی یقینی بنانے کے لیے نئی حکمت عملی پر عملدرآمد شروع کر دیا ہے۔ محکمہ فوڈ سیفٹی کے مطابق پاسکو سے گندم کی فراہمی کے بعد صوبے میں آٹے کی دستیابی مزید بہتر ہو گی۔حکومت نے آٹے کی قیمتیں مستحکم رکھنے اور عوام کو 15روپے میں روٹی کی فراہمی کا ہدف مقرر کیا ہے۔