اسلام آباد (نیوز ڈیسک)امریکی ویزا حاصل کرنے کے خواہشمند پاکستانی شہریوں کے لیے اہم خبر سامنے آئی ہے۔
امریکا کے نئے ویزا بانڈ پروگرام میں پاکستان کو شامل نہ کیے جانے کے باعث پاکستانی درخواست گزاروں پر 20 ہزار ڈالر کی قابلِ واپسی مالی ضمانت کی شرط لاگو نہیں ہوگی۔
روزنامہ جنگ کی رپورٹ کے مطابق امریکا نے اپنے 2025 ویزا بانڈ پائلٹ پروگرام کو مستقل پالیسی کی شکل دے دی ہے۔ تاہم اس پروگرام کے تحت جاری کی گئی ممالک کی فہرست میں پاکستان شامل نہیں ہے۔ اسی طرح افغانستان، ایران اور بھارت بھی اس فہرست کا حصہ نہیں ہیں۔
بین الاقوامی آن لائن جریدے کے مطابق اس پروگرام میں بنگلہ دیش، نیپال اور متعدد افریقی ممالک سمیت تقریباً 50 ممالک کو شامل کیا گیا ہے۔
نئے امریکی ضوابط کے تحت فہرست میں شامل ممالک کے کاروباری اور سیاحتی ویزا درخواست گزاروں کے لیے قابلِ واپسی ویزا بانڈ کی حد 15 ہزار ڈالر سے بڑھا کر 20 ہزار ڈالر کر دی گئی ہے۔
پاکستان کا نام اس فہرست میں شامل نہ ہونے کے باعث پاکستانی شہریوں کو امریکی ویزا درخواست کے دوران اس اضافی 20 ہزار ڈالر کے بانڈ کی شرط پوری نہیں کرنا پڑے گی، جسے پاکستانی درخواست گزاروں کے لیے ایک مثبت پیش رفت قرار دیا جا رہا ہے۔
