اسلام آباد (نیوز ڈیسک)عالمی منڈی میں خام تیل کی قیمتوں میں نمایاں کمی دیکھنے میں آئی ہے، جہاں کاروباری ہفتے کے پہلے روز اختتامی ٹریڈنگ کے دوران قیمتیں تقریباً 7 فیصد تک گر گئیں۔ اس کمی کے بعد تیل کی قیمتیں 13 جولائی کے بعد اپنی کم ترین سطح پر پہنچ گئی ہیں۔

مارکیٹ اعداد و شمار کے مطابق برینٹ خام تیل کی قیمت میں 6.35 ڈالر فی بیرل کمی ریکارڈ کی گئی، جس کے بعد یہ 83.77 ڈالر فی بیرل پر بند ہوا۔ اسی طرح ویسٹ ٹیکساس انٹرمیڈیٹ (WTI) خام تیل 4.33 ڈالر سستا ہو کر 80.34 ڈالر فی بیرل کی سطح پر آ گیا۔

ماہرین کے مطابق قیمتوں میں یہ نمایاں کمی ایسے وقت میں سامنے آئی جب امریکی محکمہ توانائی کی تازہ رپورٹ میں انکشاف ہوا کہ امریکا کے اسٹریٹجک پیٹرولیم ریزرو میں خام تیل کے ذخائر 1983 کے بعد اپنی کم ترین سطح تک پہنچ گئے ہیں۔

رپورٹ میں بتایا گیا کہ ذخائر میں یہ کمی اس فیصلے کے بعد سامنے آئی، جس کے تحت ٹرمپ انتظامیہ نے اسٹریٹجک ذخائر سے 172 ملین بیرل خام تیل جاری کرنے کی منظوری دی تھی۔ تجزیہ کاروں کا کہنا ہے کہ عالمی توانائی مارکیٹ اس پیش رفت پر گہری نظر رکھے ہوئے ہے، کیونکہ اس کے اثرات آئندہ دنوں میں تیل کی قیمتوں اور عالمی منڈی کے رجحان پر بھی مرتب ہو سکتے ہیں۔