اسلام آباد (نیوز ڈیسک)متحدہ عرب امارات نے موسمِ گرما کی تعطیلات کے دوران سیاحت کے فروغ اور بیرونِ ملک سے آنے والے خاندانوں کو سہولت دینے کے لیے بچوں کے ٹورسٹ ویزا سے متعلق اہم فیصلہ کیا ہے۔
نئی پالیسی کے تحت 15 جولائی سے 15 ستمبر 2026 تک 18 سال سے کم عمر بچوں کے لیے سرکاری ٹورسٹ ویزا فیس وصول نہیں کی جائے گی۔بین الاقوامی میڈیا رپورٹس کے مطابق یہ رعایت صرف ان بچوں کے لیے ہوگی جو اپنے والدین کے ساتھ سیاحتی مقصد سے یو اے ای آئیں گے۔ حکام نے واضح کیا ہے کہ والدین اور بچوں کی ویزا درخواستیں ایک ساتھ جمع کرانا ضروری ہوگا، ورنہ فیس معافی کی سہولت حاصل نہیں کی جا سکے گی۔اماراتی حکام کے مطابق یہ سہولت ان بچوں پر لاگو نہیں ہوگی جو پہلے سے متحدہ عرب امارات میں مقیم افراد کی کفالت میں رہ رہے ہیں۔ اس اقدام کا مقصد بین الاقوامی سیاح خاندانوں کی حوصلہ افزائی کرنا اور ملک میں سیاحتی سرگرمیوں کو مزید فروغ دینا ہے۔اگرچہ سرکاری ویزا فیس معاف کر دی گئی ہے، تاہم درخواست گزاروں کو ٹریول انشورنس، ویزا پروسیسنگ اور ٹریول ایجنسی کے سروس چارجز بدستور ادا کرنا ہوں گے۔
ذرائع کے مطابق یہ اضافی اخراجات اوسطاً 120 درہم فی بچہ ہو سکتے ہیں۔عام طور پر بچوں کے ٹورسٹ ویزا پر 250 سے 350 درہم تک لاگت آتی ہے، لہٰذا اس رعایت سے دو بچوں کے ساتھ سفر کرنے والے خاندان تقریباً 500 سے 700 درہم تک کی بچت کر سکتے ہیں۔اعلامیے میں یہ بھی بتایا گیا ہے کہ فیس میں یہ رعایت 30 روزہ اور 60 روزہ ٹورسٹ ویزا کی ابتدائی درخواستوں پر دستیاب ہوگی۔ تاہم اگر بعد میں ویزا میں توسیع کی ضرورت پیش آئے تو اس کے لیے مقررہ سرکاری فیس معمول کے مطابق ادا کرنا ہوگی، کیونکہ فیس معافی صرف پہلی درخواست تک محدود رکھی گئی ہے۔
