اسلام آباد (نیوز ڈ یسک) مشرقِ وسطیٰ میں جاری کشیدہ صورتحال کے باعث عالمی منڈی میں خام تیل کی قیمتوں میں اضافے کا رجحان برقرار ہے،

جبکہ آج کے کاروبار کے دوران بھی تیل مزید مہنگا ہوگیا۔میڈیا رپورٹس کے مطابق ایران کی جانب سے آبنائے ہرمز سے گزرنے والے دو جہازوں کو روکنے سے متعلق بیان کے بعد عالمی تیل مارکیٹ میں بے یقینی کی فضا پیدا ہوئی، جس کے نتیجے میں خام تیل کی قیمتوں میں مزید اضافہ ریکارڈ کیا گیا۔تازہ اعداد و شمار کے مطابق برینٹ خام تیل کی قیمت میں 1.104 ڈالر، یعنی تقریباً 1.3 فیصد اضافہ ہوا، جس کے بعد فی بیرل قیمت 90.17 ڈالر تک پہنچ گئی۔

اس سے قبل ایرانی خبر رساں ادارے نے دعویٰ کیا تھا کہ پاسدارانِ انقلاب نے آبنائے ہرمز سے گزرنے والے دو آئل ٹینکرز کو روک لیا، جبکہ مزید چار بحری جہازوں نے اپنی منزل کا رخ تبدیل کر لیا۔ادھر ایران نے یہ دعویٰ بھی کیا ہے کہ اس کی کارروائیوں کے دوران کویت میں واقع ایک فضائی اڈے کو نشانہ بنایا گیا، جہاں امریکی فوجی تنصیبات کو نقصان پہنچنے کا الزام عائد کیا گیا ہے۔ماہرین کے مطابق خطے میں بڑھتی ہوئی کشیدگی عالمی توانائی منڈی پر اثر انداز ہو رہی ہے، جس کے باعث خام تیل کی قیمتوں میں اتار چڑھاؤ کا سلسلہ آئندہ بھی جاری رہنے کا امکان ہے۔