اسلام آباد (نیوز ڈیسک) سعودی عرب نے پاکستان کو فراہم کیے گئے 5 ارب ڈالر سے زائد کے مالی تعاون کی مدت میں توسیع کرتے ہوئے قرض رول اوور کرنے کا فیصلہ کیا ہے،
جس سے پاکستان کو قلیل مدت کے مالی دباؤ میں ریلیف ملے گا۔میڈیا رپورٹس کے مطابق یہ رقم سعودی عرب نے پاکستان کو متحدہ عرب امارات کے واجبات کی ادائیگی میں سہولت فراہم کرنے کے لیے دی تھی۔ذرائع کا کہنا ہے کہ مذکورہ مالی معاونت ابتدائی طور پر صرف تین ماہ کے لیے فراہم کی گئی تھی، تاہم اب اس کی مدت میں توسیع کر دی گئی ہے، جس کے نتیجے میں پاکستان کو فوری ادائیگیوں کے حوالے سے مزید مہلت حاصل ہو گئی ہے۔
رپورٹس کے مطابق اس پیش رفت سے پاکستان کے زرمبادلہ کے ذخائر اور مجموعی مالی استحکام کو سہارا ملنے کی توقع ظاہر کی جا رہی ہے، جبکہ حکومت کے لیے بیرونی مالی ذمہ داریوں کی ادائیگی میں بھی آسانی پیدا ہوگی۔
