اسلام آباد(نیوز ڈیسک)بین الاقوامی منڈی میں خام تیل کی قیمتوں میں نمایاں کمی کے بعد پاکستان میں بھی پیٹرولیم مصنوعات کے نرخ کم ہونے کی توقع ظاہر کی جا رہی ہے۔

رپورٹس کے مطابق عالمی مارکیٹ میں خام تیل کی قیمتوں میں تقریباً پانچ فیصد تک کمی ریکارڈ کی گئی ہے، جس کے بعد آئل اینڈ گیس ریگولیٹری اتھارٹی (اوگرا) آج عالمی قیمتوں کو مدنظر رکھتے ہوئے نئی قیمتوں کی سفارشات مرتب کرے گی۔ماہرین کا کہنا ہے کہ اگر عالمی منڈی میں قیمتوں میں کمی کا یہی رجحان برقرار رہا تو ملک میں بھی پیٹرول اور ڈیزل کی قیمتوں میں قابل ذکر کمی سامنے آ سکتی ہے۔یاد رہے کہ گزشتہ ایک ہفتے کے دوران پیٹرولیم مصنوعات کی قیمتوں میں غیر معمولی اضافہ دیکھنے میں آیا تھا، جس کے نتیجے میں پیٹرول کی قیمت میں مجموعی طور پر تقریباً 24 روپے جبکہ ہائی اسپیڈ ڈیزل کی قیمت میں 60 روپے سے زائد اضافہ کیا گیا تھا۔

حکومت نے اس اضافے کی وجہ عالمی سطح پر خام تیل کی بڑھتی ہوئی قیمتوں اور درآمدی اخراجات میں اضافے کو قرار دیا تھا۔دوسری جانب آئل مارکیٹنگ کمپنیوں نے پیٹرولیم مصنوعات کی قیمتوں کا روزانہ کی بنیاد پر تعین کرنے کے مجوزہ نظام پر تحفظات کا اظہار کیا ہے۔ ان کا مؤقف ہے کہ اس طریقہ کار سے کاروباری منصوبہ بندی، اسٹاک مینجمنٹ اور سپلائی چین متاثر ہو سکتی ہے، لہٰذا کسی بھی نئے نظام کے نفاذ سے قبل تمام متعلقہ فریقوں سے مشاورت کی جانی چاہیے۔