اسلام آباد(نیوز ڈیسک) متحدہ عرب امارات میں اگست کے دوران ممکنہ سرکاری تعطیل کے حوالے سے رہائشیوں کے لیے خوش آئند اطلاعات سامنے آئی ہیں۔
نبی کریم ﷺ کے یومِ ولادت کے موقع پر تین روزہ تعطیلات ملنے کا امکان ظاہر کیا جا رہا ہے۔ذرائع کے مطابق اگرچہ تعطیل کی متوقع تاریخ 25 اگست 2026 (منگل) ہے، تاہم امکان ہے کہ حکام اس سرکاری چھٹی کو 24 اگست (پیر) کو منتقل کر دیں۔ اگر ایسا ہوا تو ہفتہ، اتوار اور پیر ملا کر شہریوں کو مسلسل تین دن کی تعطیلات میسر آ سکتی ہیں۔متحدہ عرب امارات کے موجودہ قوانین کے مطابق اگر کوئی سرکاری تعطیل ہفتے کے وسط میں آئے تو حکومت ضرورت کے مطابق اسے ہفتے کے آغاز یا اختتام پر منتقل کر سکتی ہے تاکہ طویل ویک اینڈ فراہم کیا جا سکے۔تاہم تعطیل کی حتمی تاریخ کا اعلان رویتِ ہلال کے بعد متعلقہ حکام کی جانب سے کیا جائے گا۔
قوانین کے تحت سرکاری اور نجی اداروں کے ملازمین کو منظور شدہ پبلک ہالی ڈے پر باقاعدہ تنخواہ کے ساتھ چھٹی دی جاتی ہے، جبکہ اگر کسی ملازم سے اس روز ڈیوٹی لی جائے تو اسے قانون کے مطابق اضافی معاوضہ یا متبادل سہولت فراہم کی جاتی ہے۔
