اسلام آباد (نیوز ڈیسک ) آئل کمپنیز ایڈوائزری کونسل (او سی اے سی) نے حکومت کو خبردار کیا ہے کہ اگر فوری انتظامی اقدامات نہ کیے گئے تو ملک کے مختلف علاقوں میں پیٹرول کی دستیابی متاثر ہو سکتی ہے۔

کونسل کے مطابق اس وقت ملک میں پیٹرول کا ذخیرہ تقریباً 3 لاکھ 70 ہزار ٹن ہے، جو اندازاً صرف 15 روز کی ضروریات پوری کرنے کے لیے کافی ہے۔ او سی اے سی کا کہنا ہے کہ درآمدی پیٹرول کی کسٹمز کلیئرنس میں تاخیر کے باعث سپلائی چین متاثر ہو رہی ہے اور یہ ایندھن بروقت مارکیٹ تک نہیں پہنچ پا رہا۔او سی اے سی نے مزید بتایا کہ اگر کلیئرنس کے عمل میں تاخیر برقرار رہی تو مستقبل قریب میں مختلف شہروں میں پیٹرول کی قلت پیدا ہونے کا امکان بڑھ سکتا ہے۔کونسل نے حکومت سے مطالبہ کیا ہے کہ آئل مارکیٹنگ کمپنیوں کے 66 ارب 70 کروڑ روپے سے زائد کے زیر التوا واجبات جلد از جلد ادا کیے جائیں۔

ان کے مطابق مالی دباؤ کے باعث کمپنیوں کی درآمدی استعداد متاثر ہونے کا خدشہ ہے، جس سے ایندھن کی فراہمی مزید مشکلات کا شکار ہو سکتی ہے۔او سی اے سی نے حکومت پر زور دیا ہے کہ درآمدی پیٹرولیم مصنوعات کی کسٹمز کلیئرنس کا عمل فوری مکمل کیا جائے اور ہنگامی بنیادوں پر ضروری فیصلے کیے جائیں، تاکہ ملک میں پیٹرول کی بلا تعطل فراہمی یقینی بنائی جا سکے اور ممکنہ قلت سے بچا جا سکے۔