اسلام آباد (نیوز ڈیسک)وفاقی حکومت نے پیٹرولیم مصنوعات کی قیمتوں میں اضافہ کرتے ہوئے نئی قیمتوں کا باضابطہ نوٹیفکیشن جاری کر دیا ہے، جس کا اطلاق 11 جولائی سے ملک بھر میں ہوگا۔

جاری کردہ اعلامیے کے مطابق پیٹرول کی قیمت میں 13 روپے 18 پیسے فی لیٹر جبکہ ہائی اسپیڈ ڈیزل 13 روپے 80 پیسے فی لیٹر مہنگا کر دیا گیا ہے۔

پیٹرولیم ڈویژن کے مطابق اضافے کے بعد پیٹرول کی نئی قیمت 310 روپے 71 پیسے فی لیٹر مقرر کی گئی ہے، جبکہ ہائی اسپیڈ ڈیزل 323 روپے 30 پیسے فی لیٹر میں دستیاب ہوگا۔

سرکاری نوٹیفکیشن کے تحت نئی قیمتوں پر عملدرآمد 11 جولائی سے شروع ہو چکا ہے، جس کے بعد ملک بھر میں صارفین کو دونوں اہم ایندھن پہلے کے مقابلے میں زیادہ نرخوں پر خریدنا ہوں گے۔

یاد رہے کہ حکومت بین الاقوامی منڈی میں خام تیل کی قیمتوں، درآمدی لاگت، روپے کی قدر اور دیگر معاشی عوامل کو مدنظر رکھتے ہوئے ہر پندرہ روز بعد پیٹرولیم مصنوعات کی قیمتوں پر نظرثانی کرتی ہے اور اسی بنیاد پر نئی قیمتوں کا تعین کیا جاتا ہے۔