اسلام آباد (نیوز ڈیسک)حکومت نے آئندہ مالی سال کے لیے گیس کے نرخوں میں کمی نہ کرنے کا فیصلہ کیا ہے، حالانکہ ریگولیٹری ادارے کی جانب سے اوسط مقررہ قیمت میں کمی کی سفارش کی گئی تھی۔
ذرائع کے مطابق آئل اینڈ گیس ریگولیٹری اتھارٹی (اوگرا) نے سوئی سدرن اور سوئی ناردرن کے لیے اوسط مقررہ گیس قیمت 1,793 روپے فی ایم ایم بی ٹی یو سے کم کر کے 1,705 روپے فی ایم ایم بی ٹی یو مقرر کی ہے۔
تاہم اس کمی کے باوجود وفاقی حکومت نے مالی سال 2026-27 کے دوران صارفین کے لیے موجودہ گیس ٹیرف برقرار رکھنے کا فیصلہ کیا ہے، جس کے باعث گھریلو اور دیگر صارفین کو نرخوں میں کسی قسم کی کمی کا فائدہ نہیں ملے گا۔
پیٹرولیم ڈویژن کے ایک سینئر عہدیدار کے مطابق یہ فیصلہ دونوں سرکاری گیس کمپنیوں، سوئی ناردرن اور سوئی سدرن، کی مالی صورتحال کو مستحکم رکھنے کے مقصد سے کیا گیا ہے تاکہ ان کے مالی خسارے میں مزید اضافہ نہ ہو۔
سرکاری ذرائع کا مزید کہنا ہے کہ حکومت نے اپنے اس فیصلے سے عالمی مالیاتی فنڈ (آئی ایم ایف) کو بھی باضابطہ طور پر آگاہ کر دیا ہے۔
