اسلام آباد (نیوز ڈیسک)وفاقی حکومت نے عوام کو جزوی ریلیف دیتے ہوئے پیٹرولیم مصنوعات کی قیمتوں میں کمی کا اعلان کر دیا ہے۔ نئی قیمتوں کا اطلاق آج رات 12 بجے سے کر دیا گیا ہے۔

پیٹرولیم ڈویژن کی جانب سے جاری اعلامیے کے مطابق پیٹرول کی فی لیٹر قیمت میں ایک روپے 97 پیسے کی کمی کی گئی ہے، جس کے بعد نئی قیمت 297 روپے 53 پیسے فی لیٹر مقرر کی گئی ہے۔

اسی طرح ہائی اسپیڈ ڈیزل بھی ایک روپے 97 پیسے فی لیٹر سستا کر دیا گیا ہے، جس کے بعد اس کی نئی قیمت 309 روپے 50 پیسے فی لیٹر ہو گئی ہے۔

دوسری جانب حکومت نے پیٹرول پر عائد پیٹرولیم لیوی میں اضافہ کرتے ہوئے اس کا الگ نوٹیفکیشن بھی جاری کر دیا ہے۔ نوٹیفکیشن کے مطابق پیٹرول پر لیوی 64 روپے 14 پیسے سے بڑھا کر 70 روپے 36 پیسے فی لیٹر کر دی گئی ہے۔

اس کے برعکس ڈیزل پر لیوی میں 6 روپے 22 پیسے فی لیٹر کی کمی کی گئی ہے، جس کے بعد اس کی شرح 77 روپے 4 پیسے سے کم ہو کر 70 روپے 82 پیسے فی لیٹر رہ گئی ہے۔

اعلامیے میں مزید بتایا گیا ہے کہ مٹی کے تیل پر عائد لیوی میں کوئی تبدیلی نہیں کی گئی اور یہ بدستور 20 روپے 36 پیسے فی لیٹر برقرار رہے گی۔