اسلام آباد (نیوز ڈیسک) نائب وزیراعظم اور وزیر خارجہ سینیٹر اسحاق ڈار کی زیر صدارت نیشنل اسٹیئرنگ کمیٹی برائے فیول سبسڈی کا ساتواں اجلاس منعقد ہوا،
جس میں ملک بھر میں جاری فیول سبسڈی پروگرام اور اس کی پیش رفت کا تفصیلی جائزہ لیا گیا۔اجلاس کے دوران موٹر سائیکل سواروں، چھوٹے کاشتکاروں، پبلک ٹرانسپورٹ اور مال بردار گاڑیوں کے شعبے کے لیے مختلف صوبوں اور علاقوں میں دی جانے والی سبسڈی پر بریفنگ دی گئی۔ اس حوالے سے پنجاب، سندھ، خیبرپختونخوا، بلوچستان، گلگت بلتستان اور آزاد کشمیر میں اسکیم کے نفاذ کی صورتحال کا جائزہ لیا گیا۔کمیٹی کو بتایا گیا کہ عالمی منڈی میں تیل کی قیمتوں میں نمایاں کمی کے بعد حکومت نے اس کا فائدہ براہِ راست عوام تک منتقل کر دیا ہے۔ اس پیش رفت کے بعد وزیراعظم کی منظوری سے فیول سبسڈی پروگرام کو ختم کرنے پر اتفاق کیا گیا۔اجلاس سے خطاب کرتے ہوئے نائب وزیراعظم اسحاق ڈار نے مختلف وفاقی اور صوبائی اداروں کے درمیان مؤثر تعاون کو سراہا اور کہا کہ اس پروگرام پر عملدرآمد کے دوران حاصل ہونے والے تجربات کو محفوظ کرنا ضروری ہے۔
انہوں نے ہدایت کی کہ منصوبے کے دوران جمع ہونے والے ڈیٹا، انتظامی طریقہ کار اور ترسیلی نظام کا مکمل جائزہ لیا جائے، جبکہ موجودہ خامیوں اور مسائل کی نشاندہی کرکے ان کے حل کے لیے سفارشات مرتب کی جائیں تاکہ مستقبل میں عوامی سہولت کے منصوبوں کو مزید مؤثر اور شفاف بنایا جا سکے۔اسحاق ڈار نے زور دیا کہ اس پروگرام سے حاصل ہونے والے تجربات آئندہ حکومتی اقدامات کے لیے رہنمائی فراہم کریں گے اور عوامی خدمات کی فراہمی کے نظام کو مزید بہتر بنانے میں مددگار ثابت ہوں گے۔
