اسلام آباد (نیوز ڈیسک) ملک میں حالیہ پیٹرولیم قیمتوں میں کمی کے بعد پیٹرول اور ڈیزل پر عائد مختلف ٹیکسوں اور لیویز کی تفصیلات بھی سامنے آ گئی ہیں۔

دستیاب معلومات کے مطابق دونوں ایندھنوں کی مجموعی قیمت کا تقریباً 29 فیصد حصہ مختلف سرکاری ٹیکسوں اور ڈیوٹیوں پر مشتمل ہے۔ذرائع کے مطابق ایک لیٹر پیٹرول کی قیمت میں مجموعی طور پر 88 روپے 7 پیسے مختلف مدات میں وصول کیے جا رہے ہیں۔ ان میں 19 روپے 32 پیسے کسٹم ڈیوٹی، 66 روپے 25 پیسے پیٹرولیم لیوی جبکہ 2 روپے 50 پیسے کلائمیٹ سپورٹ لیوی شامل ہے۔اسی طرح ڈیزل کی فی لیٹر قیمت میں بھی ٹیکسوں اور لیویز کا نمایاں حصہ موجود ہے۔ سرکاری ذرائع کے مطابق ایک لیٹر ڈیزل پر مجموعی طور پر 91 روپے 15 پیسے کے ٹیکس نافذ ہیں۔

تفصیلات کے مطابق ڈیزل پر 15 روپے 68 پیسے کسٹم ڈیوٹی، 72 روپے 97 پیسے پیٹرولیم لیوی اور 2 روپے 50 پیسے کلائمیٹ سپورٹ لیوی وصول کی جا رہی ہے۔واضح رہے کہ حکومت نے حال ہی میں پیٹرول اور ڈیزل کی قیمتوں میں نمایاں کمی کا اعلان کیا تھا۔ اس فیصلے کے تحت پیٹرول کی قیمت میں 74 روپے 28 پیسے فی لیٹر جبکہ ہائی اسپیڈ ڈیزل کی قیمت میں 67 روپے 31 پیسے فی لیٹر کمی کی گئی۔اس کمی کے بعد پیٹرول کی نئی قیمت 299 روپے 50 پیسے فی لیٹر مقرر کی گئی ہے، جبکہ ڈیزل 311 روپے 47 پیسے فی لیٹر میں دستیاب ہوگا۔