اسلام آباد (نیوز ڈیسک) وفاقی حکومت نے ایندھن کی بچت اور کفایت شعاری کے تحت نافذ کئی پابندیوں کو ختم کرتے ہوئے

سرکاری اداروں میں معمول کے انتظامات بحال کرنے کا فیصلہ کر لیا ہے۔کابینہ ڈویژن کی جانب سے جاری نوٹیفکیشن کے مطابق سرکاری دفاتر میں اضافی تعطیل کا خاتمہ کر دیا گیا ہے، جس کے بعد تمام اداروں میں دوبارہ پانچ روزہ ورکنگ ویک نافذ ہوگا اور دفاتر معمول کے مطابق کام کریں گے۔حکومت نے سرکاری گاڑیوں کے لیے ایندھن کی فراہمی پر عائد 50 فیصد کمی بھی واپس لے لی ہے۔ اس کے علاوہ مختلف محکموں کی بڑی تعداد میں گاڑیاں بند رکھنے کا فیصلہ بھی منسوخ کر دیا گیا ہے،

جس سے سرکاری امور کی انجام دہی میں آسانی پیدا ہوگی۔نوٹیفکیشن میں کہا گیا ہے کہ گریڈ 20 اور اس سے اوپر کے افسران کی تنخواہوں سے دو روزہ کٹوتی کا فیصلہ بھی ختم کر دیا گیا ہے۔ اسی طرح سرکاری اداروں کے اخراجات میں 20 فیصد کمی سے متعلق ہدایات بھی واپس لے لی گئی ہیں۔حکومت نے وفاقی و صوبائی وزراء، مشیروں، معاونینِ خصوصی اور گورنرز کے سرکاری بیرونِ ملک دوروں پر عائد پابندی بھی ختم کر دی ہے، جس کے بعد سرکاری وفود ضرورت کے مطابق بیرونی دورے کر سکیں گے۔اس کے علاوہ سرکاری اور نجی اداروں میں صرف نصف عملے کے ساتھ کام کرنے کی پابندی بھی ختم کر دی گئی ہے، جس کے نتیجے میں تمام ادارے مکمل افرادی قوت کے ساتھ معمول کے مطابق کام کر سکیں گے۔حکومتی مؤقف کے مطابق یہ اقدامات انتظامی ضروریات، سرکاری امور کی بہتری اور کاروباری و سماجی سرگرمیوں کی مکمل بحالی کو مدنظر رکھتے ہوئے کیے گئے ہیں۔