اسلام آباد (نیوز ڈیسک) حکومت نے جیٹ فیول کی قیمت میں نمایاں کمی کرتے ہوئے فی لیٹر نرخ میں 56 روپے 97 پیسے کی کمی کر دی ہے، جس کے بعد نئی قیمت 238 روپے 87 پیسے فی لیٹر مقرر ہو گئی ہے۔
ذرائع کے مطابق جیٹ فیول سستا ہونے کے بعد ملکی فضائی صنعت کو ریلیف ملنے کی توقع ہے، جبکہ آنے والے دنوں میں اندرونِ ملک اور بین الاقوامی فضائی کرایوں میں بھی کمی کا امکان ظاہر کیا جا رہا ہے۔
میڈیا رپورٹس کے مطابق ایندھن کی قیمتوں میں کمی سے ایئر لائنز کے آپریٹنگ اخراجات کم ہوں گے، جس کا فائدہ مسافروں کو کم کرایوں کی صورت میں مل سکتا ہے۔
واضح رہے کہ اس سے قبل حکومت نے عوام کو بڑا ریلیف دیتے ہوئے پیٹرول کی قیمت میں 74 روپے فی لیٹر اور ہائی اسپیڈ ڈیزل کی قیمت میں 67 روپے فی لیٹر کمی کا اعلان بھی کیا تھا، جس کے بعد مختلف شعبوں میں مزید قیمتوں میں کمی کی توقعات پیدا ہو گئی ہیں۔
