اسلام آباد (نیوز ڈیسک) ایران اور امریکا کے درمیان طے پانے والے امن معاہدے کے بعد پاکستان میں ایرانی کرنسی کی خرید و فروخت میں نمایاں تیزی دیکھنے میں آ رہی ہے۔

ایکسچینج کمپنیز ایسوسی ایشن آف پاکستان کے چیئرمین ملک بوستان کے مطابق معاہدے کے فوری بعد ایرانی ریال کی مانگ میں غیر معمولی اضافہ ریکارڈ کیا گیا۔ انہوں نے بتایا کہ معاہدے کے پہلے ہی دن تقریباً 40 ارب ایرانی ریال خریدے گئے تھے۔

ان کا کہنا تھا کہ گزشتہ چار روز کے دوران ملک بھر میں مجموعی طور پر تقریباً 2 کھرب ایرانی ریال کی خریداری کی جا چکی ہے، جو سرمایہ کاروں اور تاجروں کی بڑھتی ہوئی دلچسپی کو ظاہر کرتی ہے۔

دوسری جانب زرمبادلہ مارکیٹ میں ایرانی ریال کی قدر اور طلب دونوں میں مسلسل اضافہ دیکھا جا رہا ہے۔ ماہرین کے مطابق ایران اور امریکا کے درمیان کشیدگی میں کمی اور مستقبل میں معاشی سرگرمیوں کی بحالی کی توقعات کے باعث سرمایہ کار ایرانی کرنسی کی جانب متوجہ ہو رہے ہیں۔