اسلام آباد (این این آئی)ایشیائی ترقیاتی بینک نے پاکستان میں انشورنس شعبیکی اصلاحات کے لیے 700 ملین ڈالر کی پالیسی پر مبنی قرض کی منظوری دے دی۔

اے ڈی بی کے مطابق پروگرام کا مقصد انشورنس کوریج کو وسعت دینا اور تحفظ میں موجود خلا کو کم کرنا ہے، پروگرام نجی شعبے کی شمولیت کو فروغ دینے اور پائیدار اقتصادی ترقی کی حمایت کرے گا، انشورنس ٹرانسفارمیشن پروگرام پاکستان کی مالیاتی مضبوطی کو مستحکم کرے گا۔اعلامیے میں بتایا گیا کہ پروگرام کے تحت گھریلو صارفین،کاروبار،کسانوں اور عوامی مالیات کو شدید موسمی حالات، قدرتی آفات اور دیگر خطرات کیخلاف مالی تحفظ فراہم کیاجائے گا، اصلاحات سے مالیاتی کمزوریوں میں کمی، بحرانوں سے تیزی سے بحالی اور عوامی مالیات پر دبا کم ہونے کی توقع ہے۔اعلامیے کے مطابق یہ پروگرام پاکستان کے انشورنس شعبے کو قواعد پر مبنی نظام سے خطرات پر مبنی اور مارکیٹ پرمبنی نظام میں تبدیل کرنے کی حمایت کرتا ہے، اصلاحات ترقی کیلئے طویل المدتی سرمایہ متحرک کرنے اور زیادہ جامع و مضبوط انشورنس مارکیٹ کے قیام میں مدد دیں گی۔

اعلامیے میں کہا گیا کہ پاکستان میں انشورنس کی رسائی مجموعی ملکی پیداوار (جی ڈی پی)کاصرف 0.7 فیصد ہے، بہت سے گھرانے،کاروباری ادارے اور کسان ماحولیاتی، صحت سے متعلق اور اقتصادی جھٹکوں کے مقابلے میں مالی طور پر غیر محفوظ ہیں، قرض جامع مضبوطی کے اقدامات اور قدرتی آفات سے متعلق مالیاتی انتظامات کی حمایت کرے گا۔اعلامیے کے مطابق جامع اور ہنگامی حالات سے ہم آہنگ انشورنس مصنوعات،خصوصا کسانوں، خواتین اور کمزور گھرانوں کے لیے فروغ دی جائیں گی، خواتین اور لڑکیوں کی ضروریات کے مطابق انشورنس حل کو فروغ دیا جائے گا۔