اسلام آباد (نیوز ڈیسک) محرم الحرام 1448 ہجری کا چاند نظر نہ آنے کے بعد نئے اسلامی سال کا آغاز 17 جون سے ہوگا،
جبکہ 10 محرم یعنی یومِ عاشور 26 جون بروز جمعہ کو منایا جائے گا۔ اس تبدیلی کے باعث سرکاری ملازمین کو مسلسل چار دن کی تعطیلات ملنے کا امکان پیدا ہوگیا ہے۔ہر سال کی طرح وفاقی حکومت محرم الحرام کی 9 اور 10 تاریخ کو سرکاری چھٹیوں کا اعلان کرتی ہے تاکہ ملک بھر میں مجالس، جلوسوں اور دیگر مذہبی سرگرمیوں کے دوران انتظامی و سیکیورٹی امور بہتر انداز میں انجام دیے جا سکیں۔
رویتِ ہلال کے اعلان کے بعد اب 9 محرم الحرام 25 جون بروز جمعرات جبکہ 10 محرم الحرام، یومِ عاشور، 26 جون بروز جمعہ ہوگی۔ ان دو سرکاری تعطیلات کے فوراً بعد ہفتہ اور اتوار کی معمول کی ہفتہ وار چھٹیاں بھی آ رہی ہیں، جس کے نتیجے میں سرکاری ملازمین کو چار دن کا مسلسل تعطیلاتی وقفہ میسر آئے گا۔
تعطیلات کی تفصیل کے مطابق 25 جون جمعرات کو 9 محرم الحرام کی سرکاری چھٹی ہوگی، 26 جون جمعہ کو یومِ عاشور کے موقع پر عام تعطیل ہوگی، جبکہ 27 جون ہفتہ اور 28 جون اتوار کو معمول کے مطابق ہفتہ وار تعطیلات ہوں گی۔
اس طرح سرکاری اداروں میں کام کرنے والے افراد 25 جون سے 28 جون تک مسلسل چار روز کی چھٹیوں سے فائدہ اٹھا سکیں گے۔
