لاہور (نیوز ڈیسک) لاہور کے علاقے رنگ محل میں مبینہ مالی فراڈ کا ایک بڑا واقعہ سامنے آیا ہے جہاں بینک کے دو ملازمین پر ایک شہری کی کروڑوں روپے کی رقم ہتھیانے کا الزام عائد کیا گیا ہے۔

پولیس کے مطابق متاثرہ شخص رقم جمع کروانے کی غرض سے بینک پہنچا تھا، جہاں اس نے تقریباً 5 کروڑ روپے بینک عملے کے حوالے کیے۔ تاہم بعد ازاں معلوم ہوا کہ رقم بینک کے ریکارڈ میں جمع نہیں ہوئی اور دونوں ملازمین موقع سے غائب ہو گئے۔

واقعے کی اطلاع ملنے پر پولیس نے فوری کارروائی کرتے ہوئے ایک ملزم کو گرفتار کر لیا، جس کے قبضے سے 3 کروڑ روپے بھی برآمد کر لیے گئے ہیں۔

حکام کا کہنا ہے کہ دوسرے ملزم کی گرفتاری کے لیے چھاپے مارے جا رہے ہیں اور تحقیقات کا دائرہ مزید وسیع کر دیا گیا ہے تاکہ رقم کی مکمل بازیابی اور واقعے کے تمام پہلوؤں کا جائزہ لیا جا سکے۔

پولیس کے مطابق مقدمے کی تفتیش جاری ہے اور ملوث افراد کے خلاف قانون کے مطابق کارروائی عمل میں لائی جائے گی۔