اسلام آباد (نیوز ڈیسک) 200 یونٹ تک بجلی استعمال کرنے والے پروٹیکٹڈ صارفین کے لیے سبسڈی کے حوالے سے وزیر توانائی اویس لغاری نے اہم وضاحت جاری کرتے ہوئے کہا ہے کہ حکومت اس سہولت کو ختم کرنے کا کوئی ارادہ نہیں رکھتی۔

انہوں نے واضح کیا کہ کم بجلی استعمال کرنے والے مستحق صارفین کو بدستور سبسڈی فراہم کی جاتی رہے گی اور اہل خاندانوں کو ریلیف کی فراہمی میں کوئی رکاوٹ نہیں آنے دی جائے گی۔وزیر توانائی کے مطابق بجلی کے بلوں پر درج کیو آر کوڈ کے ذریعے صارفین سے ضروری معلومات حاصل کی جا رہی ہیں تاکہ مستحق افراد کی درست نشاندہی کی جا سکے۔ ان کا کہنا تھا کہ اس نئے نظام کا مقصد سبسڈی کے عمل کو مزید شفاف اور مؤثر بنانا ہے۔اویس لغاری نے بتایا کہ آئندہ سبسڈی کی فراہمی قومی شناختی کارڈ اور گھرانے کی تفصیلات کی بنیاد پر کی جائے گی، تاکہ حکومتی ریلیف صرف حقیقی حق دار صارفین تک پہنچ سکے۔انہوں نے مزید کہا کہ نئے ڈیجیٹل طریقہ کار کے تحت مستحقین کو بغیر کسی تعطل کے سبسڈی فراہم کرنے کا سلسلہ جاری رکھا جائے گا۔