اسلام آباد (نیوز ڈیسک)لاہور الیکٹرک سپلائی کمپنی (لیسکو) کے چیف ایگزیکٹو آفیسر نے شہر بھر میں موجود تمام ڈبل سورس کنکشن ایک ہفتے کے اندر ختم کرنے کی ہدایت جاری کر دی ہے۔
میڈیا رپورٹس کے مطابق لیسکو انتظامیہ نے واضح کیا ہے کہ یہ کارروائی صرف نجی آبادیوں تک محدود نہیں ہوگی بلکہ سرکاری رہائش گاہوں میں موجود ڈبل سورس کنکشن بھی ختم کیے جائیں گے۔ حکام کا کہنا ہے کہ ڈبل سورس کنکشن انسانی جانوں کے لیے خطرناک ثابت ہو سکتے ہیں۔ حال ہی میں لاہور کے علاقے مصطفیٰ آباد میں ایک لائن مین ایسے ہی کنکشن کے باعث حادثے کا شکار ہوا، جس کے بعد اس معاملے پر سخت مؤقف اختیار کیا گیا۔
لیسکو حکام نے خبردار کیا ہے کہ آئندہ اگر کسی ڈبل سورس کنکشن کی وجہ سے کوئی جانی نقصان ہوا تو متعلقہ ایکسیئن اور ایس ڈی او کے خلاف سخت محکمانہ کارروائی کی جائے گی، جس میں ملازمت سے برطرفی بھی شامل ہو سکتی ہے۔
انتظامیہ نے یہ بھی واضح کیا کہ کسی بھی بااثر شخصیت یا افسر کو ڈبل سورس کنکشن استعمال کرنے کی اجازت نہیں ہوگی۔ البتہ چند حساس سرکاری مقامات، جن میں اسپتال، گورنر ہاؤس اور وزیرِ اعلیٰ ہاؤس شامل ہیں، انہیں خودمختار فیڈر کے تحت ڈبل سورس کی محدود اجازت حاصل رہے گی۔
