کراچی(این این آئی)پاکستان ٹیلی کمیونیکیشن اتھارٹی(پی ٹی اے)نے موبائل فون صارفین کو غیر ضروری بیلنس کٹوتیوں سے بچانے کے لیے تمام موبائل نیٹ ورکس پر مفت بیلنس سیو سروس فوری فعال کرنے کی ہدایت جاری کردی ہے۔

پی ٹی اے کے مطابق موبائل نیٹ ورک آپریٹرز کی جانب سے فراہم کی جانے والی بیلنس سیو یا پی اے وائی جی بلاکر سروس صارفین کے ڈیٹا پیکج ختم ہونے کے بعد موبائل انٹرنیٹ کو خودکار طور پر بند کردیتی ہے، جس سے صارفین کا بیلنس غیر ارادی طور پر کٹنے سے محفوظ رہتا ہے۔ترجمان پی ٹی اے نے کہاکہ یہ سہولت تمام صارفین کو مفت فراہم کی جارہی ہے تاکہ ڈیٹا بنڈل مکمل ہونے کے بعد اچانک بیلنس کٹنے کی شکایات کا خاتمہ کیا جاسکے۔پی ٹی اے نے صارفین کو ہدایت کی ہے کہ وہ اپنے متعلقہ نیٹ ورک کے مخصوص یو ایس ایس ڈی کوڈ ڈائل کرکے یہ سروس فوری فعال کریں۔

پی ٹی اے کے جاری کردہ تفصیلات کے مطابق جاز صارفین *275#،زونگ صارفین *4004#،یوفون صارفین *6611#جبکہ ٹیلی نار صارفین *342#ڈائل کرکے باآسانی بیلنس سیو سروس ایکٹیویٹ کرسکتے ہیں۔پی ٹی اے نے موبائل صارفین کو مشورہ دیا ہے کہ وہ اپنے موبائل بیلنس کے تحفظ اور غیر ضروری کٹوتیوں سے بچنے کے لیے اس سہولت سے فوری استفادہ کریں۔