اسلام آباد (نیوزڈیسک) ایف آئی اے کے اینٹی کرپشن ونگ نے صدر کے علاقے میں بڑی کارروائی کرتے ہوئے کروڑوں روپے مالیت کا سونا اور چاندی ضبط کر لیا۔

ترجمان ایف آئی اے کے مطابق چھاپے کے دوران طارق نامی ملزم کو گرفتار کیا گیا، جس کے قبضے سے 40 تولہ سونا، 64 کلو چاندی اور دیگر قیمتی سامان برآمد ہوا۔ ابتدائی اندازوں کے مطابق ضبط شدہ دھاتوں کی مالیت 6 کروڑ روپے سے زیادہ ہے۔تحقیقات میں انکشاف ہوا ہے کہ برآمد کیا گیا سونا اور چاندی غیر قانونی طریقے سے ملک میں لایا گیا تھا۔ حکام کے مطابق اسمگلنگ کا یہ نیٹ ورک افغانستان، ایران اور چین سے قیمتی دھاتیں پاکستان منتقل کرتا تھا۔

ایف آئی اے کا کہنا ہے کہ ملزمان خصوصی مشینوں کے ذریعے سونے اور چاندی کے بسکٹ تیار کرتے اور بعد ازاں انہیں غیر قانونی مارکیٹ میں فروخت کرتے تھے۔ادارے کے مطابق گرفتار ملزم کے دیگر ساتھیوں کی گرفتاری کے لیے بھی کارروائیاں جاری ہیں جبکہ مقدمہ درج کر کے مزید تفتیش شروع کر دی گئی ہے۔