اسلام آباد (نیوز ڈ یسک) وزیر اعظم شہباز شریف نے پیٹرولیم مصنوعات کی قیمتوں میں نمایاں کمی کا اعلان کر دیا ہے،

جس کے تحت ڈیزل اور پیٹرول دونوں سستے کر دیے گئے ہیں۔قوم سے خطاب کرتے ہوئے وزیر اعظم نے بتایا کہ ڈیزل کی قیمت میں 135 روپے فی لیٹر جبکہ پیٹرول کی قیمت میں 12 روپے فی لیٹر کمی کی جا رہی ہے۔ اس فیصلے کے بعد ڈیزل کی نئی قیمت 385 روپے اور پیٹرول کی قیمت 366 روپے فی لیٹر مقرر ہوگی۔اپنے خطاب میں وزیر اعظم نے اس موقع کو اہم قرار دیتے ہوئے کہا کہ خطے میں کشیدگی کے بجائے امن کی بات ہو رہی ہے اور متعلقہ ممالک مذاکرات کے لیے آمادہ ہو چکے ہیں۔انہوں نے ایران اور امریکا کی قیادت کا شکریہ ادا کرتے ہوئے کہا کہ دونوں ممالک نے ان کی تجویز کو قبول کیا اور جلد ہی اسلام آباد میں مذاکرات کے لیے آ رہے ہیں۔

ان کے بقول یہ صرف پاکستان ہی نہیں بلکہ پوری امتِ مسلمہ کے لیے ایک اہم لمحہ ہے۔وزیر اعظم نے مزید بتایا کہ دونوں فریقین کو عارضی جنگ بندی پر آمادہ کیا گیا ہے اور انہیں پاکستان میں مذاکرات کی دعوت دی گئی ہے۔ انہوں نے اس کامیابی پر وزیر خارجہ، ان کی ٹیم اور خاص طور پر فیلڈ مارشل جنرل عاصم منیر کو بھی مبارکباد پیش کی۔