اسلام آباد (نیوز ڈ یسک)پنجاب حکومت نے دیہی علاقوں میں جائیداد کے لین دین سے وابستہ افراد کے لیے اہم رعایت کا اعلان کیا ہے،

جس سے پراپرٹی کے شعبے کو فائدہ پہنچنے کی توقع ہے۔میڈیا رپورٹس کے مطابق گورنر پنجاب سردار سلیم حیدر خان نے اسٹامپ ڈیوٹی ترمیمی آرڈیننس 2026 کی منظوری دے دی ہے، جس کے بعد نئی شرح کا اطلاق ہو گیا ہے۔نئے قانون کے تحت شہری اور دیہی دونوں علاقوں میں اسٹامپ ڈیوٹی کی شرح یکساں کرتے ہوئے ایک فیصد مقرر کر دی گئی ہے، جس سے قواعد و ضوابط میں ہم آہنگی پیدا ہوگی۔اس سے پہلے شہری علاقوں میں بھی اسٹامپ ڈیوٹی ایک فیصد تھی، جبکہ دیہی علاقوں میں اس حوالے سے مختلف شرح لاگو تھی، جسے اب ختم کر دیا گیا ہے۔

گورنر پنجاب کے مطابق اس اقدام کا مقصد قوانین کو سادہ بنانا اور سرمایہ کاری کو فروغ دینا ہے، جبکہ اس سے خاص طور پر دیہی علاقوں میں پراپرٹی کے کاروبار میں تیزی آنے کی امید ظاہر کی جا رہی ہے۔