اسلام آباد (نیوز ڈ یسک)ٹرین کے ذریعے سفر کرنے والوں کے لیے اچھی خبر سامنے آئی ہے،

کیونکہ محکمہ ریلوے نے بند پڑے کئی روٹس کو دوبارہ فعال بنانے کا فیصلہ کر لیا ہے۔پاکستان میں بڑی تعداد میں لوگ طویل اور اندرونِ ملک سفر کے لیے ریل کو ترجیح دیتے ہیں، جس کے باعث روزانہ ہزاروں مسافر اس سہولت سے فائدہ اٹھاتے ہیں۔میڈیا رپورٹس کے مطابق ریلوے حکام نے بند کیے گئے 9 روٹس کی بحالی کا منصوبہ تیار کر لیا ہے، جس سے سفری سہولیات میں بہتری آنے کی توقع ہے۔اس حوالے سے ایک اہم اجلاس منعقد ہوا جس کی صدارت پنجاب کی سینئر وزیر مریم اورنگزیب اور وفاقی وزیر ریلوے حنیف عباسی نے کی۔ اجلاس میں پنجاب حکومت اور پاکستان ریلویز کے درمیان اشتراک پر تفصیلی غور کیا گیا، جبکہ وزیراعلیٰ پنجاب مریم نواز کی ہدایت پر ان روٹس کو بحال کرنے کا فیصلہ کیا گیا۔اجلاس کے دوران لاہور سے راولپنڈی تک فاسٹ ٹرین منصوبے کی پیش رفت کا بھی جائزہ لیا گیا،

اور بتایا گیا کہ نیسپاک کی جانب سے 8 سب اربن لوپس کی فزیبلٹی مکمل ہونے کے بعد مفاہمتی یادداشت پر دستخط کیے جائیں گے۔سینئر وزیر کے مطابق ان منصوبوں کی تکمیل میں پنجاب حکومت اور ریلوے کی مشترکہ کاوشیں شامل ہوں گی، جبکہ ان روٹس کی بحالی سے 8 کروڑ سے زائد افراد کو سفری سہولت میسر آئے گی۔