اسلام آباد (نیوز ڈیسک) وفاقی دارالحکومت میں جائیداد کے خریداروں اور فروخت کنندگان کے لیے ایک بڑی سہولت کا اعلان کیا گیا ہے، جس کے تحت پراپرٹی ٹرانسفر فیس میں نمایاں کمی کر دی گئی ہے۔

تفصیلات کے مطابق کیپٹل ڈویلپمنٹ اتھارٹی (سی ڈی اے) نے اپنے زیرِ انتظام تمام پراپرٹیز پر عائد ٹرانسفر چارجز کم کرنے کا فیصلہ کیا ہے، جس سے شہریوں پر مالی دباؤ میں واضح کمی آئے گی۔نئی پالیسی کے تحت اب خریداروں کو ایف بی آر کی مقررہ ویلیو کے مطابق 3 فیصد کے بجائے صرف 1 فیصد فیس ادا کرنا ہوگی، جو کہ پہلے کے مقابلے میں ایک بڑی رعایت ہے۔یہ فیصلہ 9 اپریل 2026 کو ہونے والے سی ڈی اے بورڈ کے تیسرے اجلاس میں کیا گیا، جبکہ اس سے قبل جولائی 2025 میں جاری کردہ نوٹیفکیشن کو ختم کر دیا گیا ہے اور نئی ہدایات فوری طور پر نافذ کر دی گئی ہیں۔

سی ڈی اے انتظامیہ نے متعلقہ شعبوں اور دیگر اسٹیک ہولڈرز کو ہدایت جاری کی ہے کہ وہ بلا تاخیر نئے قواعد کے مطابق پراپرٹی ٹرانسفر کے معاملات مکمل کریں۔

ماہرین کے مطابق اس اقدام سے نہ صرف شہریوں کو ریلیف ملے گا بلکہ اسلام آباد میں ریئل اسٹیٹ کے شعبے میں سرمایہ کاری اور کاروباری سرگرمیوں میں بھی اضافہ متوقع ہے۔