اسلام آباد (نیوز ڈیسک) نیشنل ڈیٹا بیس اینڈ رجسٹریشن اتھارٹی (نادرا) نے شہریوں کو متنبہ کیا ہے کہ اگر شناختی کارڈ کی بروقت تجدید نہ کرائی گئی تو کئی اہم سہولیات متاثر ہو سکتی ہیں۔

تفصیلات کے مطابق نادرا نے ہدایت جاری کی ہے کہ شہری اپنے قومی شناختی کارڈ کی معیاد ختم ہونے سے پہلے اس کی تجدید یقینی بنائیں، بصورت دیگر بینک اکاؤنٹس، موبائل سمز اور دیگر بنیادی سہولیات کی فراہمی معطل کی جا سکتی ہے۔ ادارے کے مطابق ملک میں بڑی تعداد میں شناختی کارڈز ایکسپائر ہو چکے ہیں، جس کے باعث لوگوں کو سرکاری اور فلاحی اسکیموں سے محروم ہونا پڑ سکتا ہے۔پی ٹی اے کے اشتراک سے جاری اعداد و شمار کے مطابق 81 لاکھ سے زائد موبائل سمز ایسے شناختی کارڈز پر فعال ہیں جن کی معیاد ختم ہو چکی ہے، اور انہیں کسی بھی وقت بند کیا جا سکتا ہے۔نادرا نے واضح کیا ہے کہ موبائل سروس جاری رکھنے کے لیے درست اور فعال شناختی کارڈ ضروری ہے۔ مزید یہ بھی بتایا گیا ہے کہ جون کے بعد تاخیر سے تجدید کروانے والوں کو اضافی فیس یا جرمانے کا سامنا کرنا پڑ سکتا ہے۔

اتھارٹی نے متوفی افراد کے اہل خانہ کو بھی ہدایت دی ہے کہ وہ مرحومین کے نام پر رجسٹرڈ سمز کو فوری طور پر اپنے نام منتقل کروائیں۔ شناختی کارڈ کی تجدید کے لیے شہری نادرا سینٹرز کے علاوہ “پاک آئی ڈی” موبائل ایپ اور ای سہولت مراکز سے بھی فائدہ اٹھا سکتے ہیں۔